УНМИК повика на нови разговори помеѓу Приштина и Белград

29/08/2008

Реструктуирањето на УНМИК го отстрани донесувањето одлуки од нејзиниот домен, сега тој ќе се фокусира на следењето разговори помеѓу Белград и Приштина.

Од Блерта Фониќи-Кабаши за Southeast European Times во Приштина – 29/08/08

Шефот на УНМИК, Ламберто Заниер, ќе биде вклучен во разговорите. [УНМИК]

Со реструктуирањето на УНМИК мисијата повеќе нема моќ да донесува одлуки во новата независна држава, рече портпаролот на УНМИК Александар Иванко во средата (27-ми август) во Приштина. „Од 15-ти јуни УНМИК повеќе не е во позиција да наметнува договори или решенија“, рече тој.

Актуелната улога на мисијата е да го охрабри дијалогот помеѓу Белград и Приштина. УНМИК сака тие да остварат директни разговори без олеснувачи, кои ќе се фокусираат на секторите што ќе ги одреди генералниот секретар на ОН, Бан Ки-Мун.

Иванко е уверен дека еден таков дијалог помеѓу Приштина и Белград може да биде поттикнат со мониторинг на УНМИК. „Имаме дијалог преку трета страна помеѓу Приштина и Белград, а третата страна е шефот на УНМИК, и тоа е веќе позитивен чекор“, рече тој.

УНМИК сака да започне вакви директни разговори веднаш. „Всушност, од наша перспектива, ќе беше од голема корист ако ваквиот состанок се одржеше вчера, но поради позицијата на владата на Србија, таквиот состанок не беше остварлив“, рече Иванко.

Минатата недела шефот на УНМИК, Ламберто Заниер, се состана со косовскиот премиер Хашим Тачи и го информираше за актуелните, олеснати разговори, во кои Заниер е трета страна. „Следниот план е шефот на УНМИК да се состане со [српскиот министер за Косово] Горан Богдановиќ ... во септември“, рече Иванко.

Минатиот месец косовските власти рекоа дека се подготвени за разговори со Белград, но дека Србија одбила. „Приштина е подготвена да се вклучи во практични разговори со Белград за голем број прашања“, рече министерот за надворешни работи, Скендер Хисени, на крајот од јули. „Ние сме подготвени за директни разговори со Белград.“

Сепак, истите тие власти потврдија дека независноста на Косово нема да биде на агендата. „Независноста на Косово е нешто за што не може да се преговара и за што никогаш повеќе нема да се преговара“, рече Хисени.

Српскиот министер за надворешни работи, Вук Јеремиќ, вели дека Белград нема да разговара со Приштина. „Ние не сме подготвени за разговори со сецесионистичките привремени власти на Косово“, рече тој. Сепак, Белград ќе разговара за Косово со Бан, Заниер и другите официјални претставници на ОН.

Косово прогласи независност во февруари. Државата моментно има дипломатски односи со 46 земји. Србија и нејзиниот сојузник Русија и понатаму го сметаат Косово за српска покраина.