Косово бара признавање од арапските држави

28/08/2008

Косово бара дипломатско признавање од арапските земји, делумно поради културните сличности.

Од Блерта Фониќи-Кабаши за Southeast European Times во Приштина -- 28/08/08

Косовскиот претседател Фатмир Сејдиу говори на конференцијата „Косово и арапскиот свет“ во понеделникот (25-ти август). [Лаура Хасани]

Косовските водачи во понеделникот (25-ти август) ги повикаа арапските земји да ја признаат независноста на Косово за време на конференцијата „Косово и арапскиот свет“ во Приштина. Помеѓу учесниците беа и аналитичари од Средниот Исток и претставници на владата и граѓанските општества во Косово. Форум 2015, конзорциум на косовски невладини организации, го организираше настанот.

„Косовските граѓани мислеа дека арапските држави ќе бидат помеѓу првите земји што ќе го признаат Косово“, рече претседателот Фатмир Сејдиу. Наместо тоа, единствени земјите со мнозинско муслиманско население што досега го признаа Косово се: Турција, Авганистан, Албанија, Сенегал, Буркина Фасо и Сиера Леоне. Исламската конференција има 57 земји-членки.

Сејдиу ја истакна вербата на јавноста дека арапските држави ќе ја признаат независноста на Косово за брзо време, но новинарот и политичар Ветон Сурои ја критикуваше владата за наводниот недостаток на иницијатива во надворешната политика. „Косово нема вистинска ... надворешна политика и нема визија за ова прашање“, рече тој.

„Косово работи интензивно на својот процес на признавање и оваа конференција му помага на Косово“, рече министерот за надворешни работи, Скендер Хисени, бранејќи ја владата.

Либанскиот експерт Ридван ал-Сајед, советник на премиерот на својата земја, рече дека признавањето на Косово од страна на арапскиот свет ќе биде од корист за Блискиот Исток, бидејќи ќе послужи како пример за самоопределување за палестинскиот народ. Признавањето на независноста на Косово ќе [помогне во зајакнувањето] на културните врски помеѓу Косово и арапските држави“, рече Ал-Сајед.

Учесниците на конференцијата генерално го нагласија заедничкото наследство на Косово и на арапските земји како причина за зајакнувањето на дипломатските врски. Покрај своите муслимански мнозинства, тие делат и „богата традиција ... заедничкото наследство на Отоманската империја“, рече Сурои.

Во интервјуто за албанскиот сервис на ББС, Ал-Сајед го припиша доцнењето на арапското принципиелно признавање на два фактори. Прво „четири од пет“ арапски држави имаат добри односи со Русија и Србија. Второ, оние со големо, потенцијално немирно малцинско население на Курди, Бербери или Христијани, стравуваат од охрабрување на идната поделба на нивните сопствени земји со признавањето на Косово.

Но, на конференцијата тој даде надеж за Косово, велејќи дека „се работи за месеци“ во арапското дипломатско признавање.

Давајќи уште една охрабрувачка нота, турскиот министер за меѓународна соработка, Саид Јазичиоглу, потврди дека Анкара работи на тоа да му помогне на Косово да добие признавање од арапските земји што е можно поскоро. „Турција лобира за признавање на Косово“, рече тој.