Отворен Сараевскиот филмски фестивал

15/08/2008

На овогодинешниот Сараевски филмски фестивал ќе бидат прикажани повеќе од 170 филмови во 15 програми. Учесниците од целиот свет ќе можат да видат документарни, играни и краткометражни филмови од регионот на Југоисточна Европа.

Од Енвеса Хоџиќ-Ковач за Southeast European Times во Сараево -- 15/08/08

Сараевскиот филмски фестивал беше отворен во петокот вечер (16-ти август). [Енвеса Хоџиќ-Ковач]

Четиринаесеттиот Сараевски филмски фестивал (СФФ) беше отворен во петокот (15-ти август) со прикажувањето на филмот „Снег“ -- босанско-германско-француско-иранска копродукција во режија на Аида Бегиќ од Босна и Херцеговина (БиХ). Филмот ја имаше својата премиера на Канскиот филмски фестивал и освои гран во програмата Недела на критиката.

Овогодинешниот СФФ нуди разновиден избор од 174 филмови -- претежно независни продукции -- на уметници од целиот свет. Филмовите ќе бидат претставени во 15 програми: Натпреварувачка програма - игран филм, Натпреварувачка програма - краткометражен филм, Во фокусот, Натпреварувачки дел - документарен филм, Посветено: Тод Хејнес, Панорама, Панорама документарен, Нови текови, Нови текови краткометражни, Опен ер, Детска програма, Тин арена, Ол шортс, Специјални проекции и Сараево град на филмот.

Американските актери Кевин Спејси и Орландо Блум се меѓу ѕвездите кои ќе присуствуваат на фестивалот, кој ќе трае до 23-ти август.

Регионалната филмска индустрија и нејзиното промовирање и развој се главниот фокус на фестивалот, што резултира со проекција на 62 регионални продукции. Главниот настан е Натпреварувачката програма, која е отворена за филмските работници од Албанија, Австрија, БиХ, Бугарија, Црна Гора, Грција, Хрватска, Кипар, Унгарија, Македонија, Малта, Романија, Србија, Словенија, Турција и Косово.

Во Натпреварувачката програма за игран филм, десет филма ќе се натпреваруваат за четири награди: Најдобар филм, Специјална награда на жирито, Најдобра актерка и Најдобар актер.

Овогодишни учесници се: „Никогаш не сме биле во Венеција“ (Словенија), „Бјуик Ривиера“ (Хрватска-БиХ), „Четвртиот човек“ (Србија), „Девојки“ (Унгарија), „Делта“ (Унгарија), „Точка“ (Турција), „Мојот Марлон и Брандо“ (Турција), „Есен“ (Турција-Германија), „Кино Лика“ (Хрватска) и „Март“ (Австрија).

Во Натпреварувачката програма за краткометражен филм, 16 регионални краткометражни филмови ќе се натпреваруваат за Најдобар филм и Специјално признание.

Во делот за документарен филм, 15 регионални документарни филмови се борат за наградата Најдобар филм и Награда за човекови права, која беше основана од швајцарското Министерство за надворешни работи. Други фестивалски награди се: При УИП за најдобар краткометражен филм, ЕДН Талент грант, награда ЦИЦАЕ, Награда на публиката и Награда на жирито ФИПРЕСЦИ.

СФФ и неговата индустриска секција, Синелинг копродакшн маркет, им ги претставуваат најдобрите играни филмови и филмови во изработка на филмските режисери, продуценти и директори од Југоисточна Европа на меѓународните дистрибутери, телевизиските купувачи и фестивалските програми.

До денес, со заложбите на Синелинг, направени се 12 филмови -- од кои два ќе се појават во овогодинешната Натпреварувачка програма.

СФФ, еден од најголемите културни настани во БиХ, дочекува повеќе од 100.000 учесници секоја година.