Возење на автогас: нов тренд во Хрватска

21/07/2008

Поради големиот пораст на цените на суровата нафта, хрватските возачи бараат алтернативи за бензинот.

Од Кристина Чук за Southeast European Times во Загреб – 21/07/08

[Getty Images]

Цените на бензинот во Хрватска достигнаа 1,30 евра за литар -- највисока цена досега -- и имаат тенденција да продолжат да растат, но цената на течниот нафтен гас (ЛПГ), или автогасот, останува 0,45 евра за литар. Со оглед на ова, не е чудно што околу 30.000 Хрвати возат на автогас и што бројот постојано се зголемува, вели хрватското Министерство за заштита на животната средина, урбанизам и градежништво.

Во својот План за заштита и подобрување на квалитетот на воздухот, министерството проценува дека до 2010 година 150,000 возачи во Хрватска ќе преминат на автогас.

Тие се дел од светски тренд. Различни земји, како што се Пакистан, Австрија и Тајван, јавуваат за зголемен интерес за системите на ЛПГ.

Во моментов во Хрватска постојат 90 бензиски пумпи што се снабдени со автогас. Притиснати од превисоките цени на бензинот, сé повеќе возачи ги менуваат своите автомобили на автогас. Побарувачката за системот на ЛПГ е толку голема што возачите чекаат со недели на инсталирање.

Системот за автогас чини околу 1.000 евра, што брзо се надоместува со оглед на тоа што цената на автогасот е само делче од цената на бензинот. На крајот, системот за автогас дава заштеда на горивото од околу 60 отсто, во споредба со конвенционалниот бензински мотор.

Возачите што го користат економичниот систем на автогас велат дека инвестицијата се надоместува по околу 20.000 километри. Автомобил што поминува 40.000 километри годишно ќе му заштеди на својот сопственик, според некои пресметки, доволно за да купи нов автомобил.

Но, ова не се единствените предности. Автомобилите што се движат на автогас го намалуваат загадувањето на животната средина, бидејќи автогасот не содржи олово, ниту сулфур. Покрај ова, емисијата на јаглероден моноксид е за половина помала од онаа на бензинот, со уште помалку јаглероден диоксид. Во суштина, автогасот е чистосогорувачко фосилно гориво.

Трајноста на еден мотор на автомобил кој се движи на автогас е генерално помала. Сепак, тоа не е така за некои модели, кои бараат многу поправки ако работат на автогас.

Другите возачи се снаоѓаат со мешање на стара и нова нафта за домаќинствата и користење на мешавината за своите автомобили. Други, пак, сосема се откажуваат од возењето за на работа -- тие го користат јавниот транспорт или велосипедите.

Сепак, зголемувањето на цената на бензинот не претставува најголем предизвик на животот во Хрватска. Инфлацијата на сите нивоа го влече надолу животниот стандард на земјата, особено за оние со ниски примања кои се борат да си обезбедат храна и други неопходности.