Пораст на бруцелозата во Босна и Херцеговина

28/05/2008

Иако епидемијата на бруцелоза се прошири низ Федерација на Босна и Херцеговина, не се преземени мерки за спречување на нејзиното ширење.

Од Јусуф Рамадановиќ за Southeast European Times во Сараево -- 28/05/08

Луѓето може да се заболат од бруцелоза ако консумираат непастеризирано сирење или млеко. [AФП]

Босна и Херцеговина (БиХ) се соочува со епидемија на бруцелоза и мора да го спречи ширењето на болеста помеѓу луѓето и животните, предупредија студентите на Факултетот за ветерина при Сараевскиот универзитет во април, на тркалезната маса насловена како „Бруцелозата во БиХ“.

Бруцелозата, наречена и малтешка треска, е многу заразна болест што се шири преку контакт со заразено животно, со јадење сурово месо или непастеризирано сирење или пиење заразено млеко. Кај луѓето бруцелозата може да предизвика симптоми слични со оние на грипот, вклучително и температура, потење, главоболки, болки во грбот и физичка слабост. Можни се и тешки инфекции на централниот нервен систем или срцевата мембрана. Според американскиот Центар за контрола и заштита од болести, стапката на смртност е вообичаено помала од 2 отсто и е обично поврзана со ендокардитис.

„Со сегашното лекување, луѓето заздравуваат релативно брзо. Сепак, лекарите секогаш истакнуваат дека постои можност од влошување на состојбата -- повторување на симптомите и имунитетна слабост или ако има нов контакт со болеста“, објасни професорот Тарик Бајровиќ од Факултетот за ветерина при Сараевскиот универзитет.

Минатата година 500 лица починале од бруцелоза во БиХ. Властите регистрирале 104 нови случаи во текот на првите три месеци од оваа година. Во неодамнешното избивање на епидемијата највеќе беа погодени ветеринарните работници и сточарите. Експертите велат дека епидемијата е надвор од контрола. Системот за заштита од заразните болести на добитокот во Федерацијата на БиХ (ФБиХ) слабо функционира и е причина за исплашеност.

Присутните на конференцијата истакнаа дека властите прогласиле сеприсутна епидемија на бруцелоза во некои кантони на ФБиХ.

На прес-конференцијата по разговорите, Муамер Дервишевиќ, студент по ветерина, рече дека бруцелозата е присутна во БиХ веќе подолг период. Тој додаде дека таа се прошири по конфликтот во 1990-тите, првенствено поради нерегулирањето на увозот на добиток и номатското одгледување добиток.

По конфликтот драстично се зголеми распространетоста на болеста, претходно непозната во БиХ. На почетокот од 2000 година здравствените власти детектираа рани случаи помеѓу сопствениците на „донираниот“ добиток. Оттогаш болеста се шири.

Директорот на Ветеринарната управа на БиХ, Сулејман Хасимбеговиќ, е помеѓу оние кои велат дека бруцелозата во БиХ е надвор од контрола. Тој вели дека владата несоодветно ги спроведува мерките за да ја искорени болеста. Не се донесени ни потребните закони. Ситуацијата, според Хасимбеговиќ, е алармантна.

За разлика од тоа, во ЕУ бруцелозата е скоро целосно искоренета. Ветеринарниот систем во БиХ можно е да се соочи со една од своите најтешки задачи -- некако да го заштити народот од болеста иако не постои соодтвена заштита.