Стариот партиски водач за нова ера во Хрватска

12/05/2008

Конвенцијата на СДП беше голем триумф за актуелниот претседател Зоран Милановиќ. Тој доби повеќе од 79 отсто од гласовите на делегатите и најави нова политика за најголемата опозициска партија во Хрватска.

Од Наташа Радиќ за Southeast European Times во Загреб -- 12/05/08

Зоран Милановиќ во саботата (10-ти мај) беше реизбран за претседател на СДП. [Getty Images]

Зоран Милановиќ ја освои претседателската функција во Социјалдемократската партија (СДП) со убедлива победа во саботата (10-ти мај), добивајќи повеќе од 79 отсто од гласовите на делегатите. Неговите двајца најголеми противкандидати, Даворко Видовиќ и Драган Ковачевиќ, освоија 11, односно 9 отсто од гласовите. Повеќе од 1.800 делегати гласаа на претседателските избори во најголемата опозициска партија.

Милановиќ доби четиригодишен мандат. Тој за првпат стана претседател на партијата во јуни 2007 година, наследувајќи го долгогодишниот претседател на СДП, Ивица Рачан, кој почина од рак. Иако тој не успеа да ја доведе својата партија до победа на изборите во ноември 2007 година, СДП постигна најдобри резултати во својата историја, освојувајќи 56 парламентарни места. Владејачката партија ХДЗ имаше само шест места повеќе, но успеа да формира влада и да ја задржи власта. Милановиќ вели дека е подготвен и сака да ја води партијата до нејзината „победа на следните избори“.

„Нашиот тим мора да биде подготвен да ја преземе политичката власт во земјата за четири години и тогаш ние ќе ја водиме оваа земја. Ние нема да се предадеме, нема да лажеме“, рече Милановиќ во саботата.

„Мартин Лутер Кинг рече ,Имам сон.“... Јас немам сон, јас знам дека СДП има план. Тоа е план за нова и подобра Хрватска“, рече тој.

Конвенцијата во саботата беше личен триумф за Милановиќ, бидејќи никој не ја доведе во прашање неговата визина за партијата. Сепак, тој објави дека ќе продолжи со нова политика која треба да й овозможи на СДП да победи на локалните избори следната година и подоцна да го преземе парламентот.

Милановиќ се смета за решителен и понекогаш тврдоглав политичар, кој поради тоа понекогаш ги иритира „старомодните“ фракции во СДП, кои претпочитаат дебати и анализи отколку брзо носење решенија.

Затоа, Милановиќ ќе мора да ги убеди своите партиски членови дека неговите одлуки се интелигентни и неопходни. Хрватскиот весник Јутарњи лист објави дека „е можно тој да се соочи со отпор во својот сопствен двор“.

„Ние не победивме на парламентарните избори, така што СДП мора да се промени за да победи следниот пат. Кога СДП се менува, се менува и општеството“, рече Милановиќ.