Претставникот на ЕУ Фејт допатува во Косово за да ја предводи мисијата.

21/02/2008

Специјалниот претставник за ЕУ, Питер Фејт, во средата допатува во Косово за да ја следи новата мисија на ЕУ, ЕУЛЕКС. По состанокот со косовскиот претседател Фатмир Сејдиу, Фејт се обиде да ги смири српските стравувања во врска со мисијата.

Од Блерта Фониќи-Кабаши за Southeast European Times во Приштина -- 21/02/08

„Мисијата на ЕУ ќе биде присутна во цело Косово, вклучително и во северно Косово. Србите треба да знаат дека ЕУЛЕКС ќе ги загарантира правата на сите заедници“, рече специјалниот претставник на ЕУ во Косово, Питер Фејт (лево, со претседателот Фатмир Сејдиу). [Лаура Хасани]

Специјалниот претставник на ЕУ во Косово, Питер Фејт, во средата (20-ти февруари) допатува во Приштина и се состана со косовскиот претседател Фатмир Сејдиу. Фејт ќе ја надгледува мисијата на ЕУ од 1.800 припадници, која ќе му помага на Косово во воспоставувањето на административната инфраструктура што му е потребна сега откако прогласи независност.

По состанокот со Сејдиу, Фејт рече дека српската заедница треба да сфати оти новата мисија на ЕУ, наречена ЕУЛЕКС, не претставува закана.

„Мисијата на ЕУ ќе биде присутна во цело Косово, вклучително и во северно Косово. Србите треба да знаат дека ЕУЛЕКС ќе ги загарантира правата на сите заедници“, рече Фејт.

Тој објасни дека ЕУЛЕКС е, исто така, од полза и за српската заедница. „Ние нема да се повлечеме од северот на Косовска Митровица“, рече тој. „Треба да имаме многу потесна соработка со Србите, но сме во контакт и со Белград.“

Фејт во средата посочи дека го започна својот мандат.

„Сега го испраќам во Косово мојот персонал -- персоналот на канцеларијата на специјалниот претставник -- и ние формираме Меѓународна цивилна канцеларија“, рече Фејт. Тој, исто така, најави дека поранешниот командант на КФОР, генерал-полковник Ив де Кермабон, ќе допатува во текот на следните неколку недели за да ја преземе функцијата на шеф на ЕУЛЕКС.

Според Фејт, ќе има период на транзиција од четири месеци, во текот на кој ЕУ и НАТО ќе бидат под оперативна контрола. „Сите ќе работиме според резолуцијата 1244. Оваа резолуција има цврста основа за воспоставување на мисијата на ЕУ во Косово“, изјави тој за новинарите во средата, еден ден по посетата на Приштина од страна на шефот за надворешна политика на ЕУ, Хавиер Солана.

„Ќе бидам тука да ја советувам косовската влада и сум решен планот на [поранешниот претставник на ОН Марти] Aхтисари да биде спроведен“, рече тој.

Фејт рече дека -- во соработка со косовската влада -- тој ќе ги убеди Србите оти Косово е нивни дом и дека можат да работат и живеат како и другите заедници.

„Треба да сфатат дека се добредојдени да работат за иднината во Косово“, рече тој.

Сејдиу рече дека Фејт ја разбира ситуацијата во Косово многу добро и го опиша како „многу искусен човек во меѓународните мандати“.