Македонија се обидува да го брендира популарниот балкански производ како национално јадење

07/02/2008

Македонската влада сака да го брендира ајварот, производ кој е присутен во целиот регион.

Од Зоран Николовски за Southeast European Times во Скопје - 07/02/08

Ајварот се прави од црвени пиперки и модар патлиџан. [Maкедонска влада]

Ајварот е популарно јадење што се мачка на леб од Југоисточна Европа, кое се приготвува од црвени пиперки и модар патлиџан, а се разликува во одредена мера од регион до регион и традиционално се прави во домовите на есен. Иако тој може да се најде во многу земји, македонската влада се обидува да го заштити како производ под името „македонски ајвар“.

Ако Заводот за заштита на индустриска сопственост го регистрира, овој бренд ќе добие заштита како производ со одредено географско потекло. Македонија тогаш ќе може да бара меѓународна заштита преку билатералните договори со земјите што го увезуваат, според Министерството за земјоделство.

Сепак, Заводот вели дека едно словенечко претпријатие веќе се обидело да го патентира производот во Германија. Обидот не успеал бидејќи ајварот се смета за генеричко име за јадење што се мачка и со тоа не може да биде предмет на заштита како трговска марка и сопственост на една земја.

Сепак, Скопје продолжува со намерата. „Македонската влада се обидува да го направи ајварот светски познат производ“, вели портпаролот на владата, Ивица Боцевски. „Брендирањето ќе овозможи производството да се стандардизира и состојките и неговото приготвување да се најдат на етикетите. Ова, од друга страна, ќе загарантира квалитет и конкурентност дома и на светските пазари.“

Владата формираше работна група која ќе подготви стандардизирани протоколи за состојките, рецептот и производството. Производителите ќе мора да се придржуваат на строго утврдените правила и еднаш годишно да носат примероци во Технолошко-металуршкиот факултет заради контрола на квалитетот.

Македонските власти потврдија дека ајварот се произведува во многу земји под различно име. Сепак, во случајот со „македонскиот ајвар“ тие тврдат дека бараат заштита за традиционалната, локална варијанта чиј квалитет го проверуваат државните институции.