Хрватски новинари се соочуваат со обвиненија од МКТЈ

20/11/2007

Осум хрватски новинари би можеле да бидат обвинети за непочитување на судот поради објавување доверливи информации.

Од Наташа Радиќ за Southeast European Times во Загреб – 20/11/07

Вечерњи лист беше еден од весниците што ја објавија информацијаta. [Getty Images]

Меѓународниот кривичен трибунал за поранешна Југославија (МТКЈ) во Хаг, нареди сослушување на осуммина хрватски новинари, кои открија доверлии информации поврзани со судењето за воени злосторства против тројцата поранешни хрватски генерали.

Еден од новинарите, Давор Иванковиќ од Вечерњи лист, во четвртокот (15-ти ноември) беше испрашан во загребската канцеларија на Хаг во врска со неговата одлука да известува за доверливи делови од обвинението против Анте Готовина, Иван Чермак и Младен Маркач.

Тројца телевизиски новинари -- Горан Ротим, Ѓурица Дробац и Јосип Шариќ -- како и четворица други новинари од печатените медиуми -- Синиша Павиќ, Јасна Бабиќ, Снежана Павиќ и Иван Звонимир Чичак -- исто така се соочуваат со сослушување.

Во мај новинарите ги објавија имињата на неколку воени и политички претставници кои беа споменати во обвиненијата на генералите како учесници во наводниот заеднички криминален заговор во текот на 1990-тите. Седуммина од нив не беа ниту обвинети, ниту судени, но нивните имиња беа на листите.

Сите й се добро познати на хрватската јавност, и биле вклучени во доверливиот дел од обвинението. Новинарите, игнорирајќи го правилото на МКТЈ дека таквите делови не смеат да се објавуваат, ги објавиле имињата.

Новинарите ќе мора да им објаснат на претставниците на МКТЈ зошто го сториле тоа. Ним им е забрането да зборуваат за нивните разговори со истражителите и јавно да се бранат себеси.

Минатиот месец истражителите на МКТЈ го сослушаа главниот уредник на Слободнa Далмација Младен Плесе, заедно со поранешниот главен уредник на државната Хрватска телевизија, Владимир Рончевиќ, во врска со истиот случај. Никој не е обвинет по нивните сослушувања.

Ако бидат обвинети за непочитување на судот и бидат прогласени за виновни, тие би можеле да се соочат со затворска или парична казна. Преку своите адвокати, осуммината велат дека немаат намера да откријат зошто ги објавиле имињата. Заедно со голем број невладини организации во Хрватска, тие тврдат дека МКТЈ ја напаѓа слободата на медиумите и независноста на новинарите.