Според едно истражување бенефициите од ЕУ ги надминуваат трошоците за Хрватска

11/09/2007

Членството во ЕУ нема да биде евтино за Хрватска. Сепак, јавноста може да очекува повисоки плати и повеќе работни места, предвидува извештајот.

Од Наташа Радиќ за Southeast European Times во Загреб –11/09/07

Хрватска се надева дека ќе добие покана за влез во ЕУ во 2009 година. [AФП]

Според извештајот на Економскиот институт во Загреб, членството во ЕУ ќе ја чини Хрватска 1,6 милијарди евра годишно. Истовремено, јавноста веднаш ќе ги почувствува бенефициите од европската интеграција, во вид на повисоки плати и намалена невработеност.

Анализата на 1.500 страници, објавена во текот на летото, во детали го дава економското влијание од пристапот во блокот. Истиот предвидува повисок животен стандард и зајакнување на големите индустрии -- особено трговијата и туризмот -- уште од 2009 година, кога Хрватска се надева дека ќе добие покана.

Според истражувањето, стапката на невработеноста ќе се намали на 10 отсто по пристапот, од сегашните 16 отсто. БДП на земјата ќе се зголеми, како и целокупниот економски раст. Националната валута ќе остане стабилна, приливот на странските директни инвестиции ќе се зголеми и цените ќе останат стабилни, со максимално зголемување од 1,4 отсто.

Хрватите ќе заработуваат повеќе и ќе трошат повеќе, но храната, облеката, прехранбените продукти и станбениот простор, нема да станат поскапи, се заклучува во истражувањето. Сепак, летните куќи на брегот се исклучок. Нивните цени се очекува да се зголемат со либерализацијата на пазарот на недвижности.

Истражувања како ова беа спороведени и од другите земји-членки на ЕУ пред нивниот последен круг преговори со Брисел, вели директорката на институтот Сандра Сваљек. Посебно истражувањето спроведено во Полска послужи како модел за хрватскиот извештај.

Некои од бенефициите од пристапот во ЕУ може да се видат дури и сега, за време на процесот на пристап, рече главниот преговарач на Хрватска со ЕУ, Владимир Дробњак. Членството не само што ќе донесе подобар животен стандард и повисоки плати, туку и ќе додаде дополнителна вредност на хрватската политичка и социјална структура. „Таа вредност нема цена“, рече Дробњак.

И покрај тоа што целокупната слика е розова, извештајот потврдува дека некои сектори ќе се соочат со предизвици. Помеѓу нив се земјоделството и рибарството. Државните субвенции ќе бидат елиминирани по пристапот, а средствата на ЕУ ќе мора да бидат доволни со цел хрватското земјоделство да биде конкурентно на пазарот на ЕУ.

Ќе бидат потребни реформи. Државата веќе подготви земјоделска стратегија за олеснување на преминот во интегриран пазар на ЕУ, со национални квоти за секој производ.