Нова белег за главниот град на Хрватска

05/09/2007

И покрај тоа што Хрватска се смета себеси за спортски ориентирана нација, земјата се соочува со недостаток на објекти. Загребската Арена -- најголемиот спортски објект што ќе биде изграден во главниот град -- ќе помогне тоа да се промени.

Од Наташа Радиќ за Southeast European Times во Загреб - 05/09/07

Макета на загребската Арена. [Tригранит]

Загребското предградие Ланиште стана најголемо градилиште во Хрватска. Загребската Арена, вредна 87 милиони евра, која се очекува да биде главното место за Светскиот шампионат во ракомет во 2009 година, се гради таму. Кога ќе биде завршена, истата визуелно ќе доминира на јужниот влез од градот.

Унгарското претпријатие Тригранит и хрватското претпријатие Ингра беа избрани да ја градат арената. Хрватската влада и градот Загреб ги обезбедуваат финансиите. Изградбата започна на крајот од јули и се очекува да трае 15 месеци. Загребскиот градоначалник Милан Бандиќ вели дека градежните работи ќе се вршат и ноќе, под светло, за да може проектот да биде завршен навреме.

Арената е прв спортски објект од оваа големина што се гради во Загреб и очекувањата се високи. Хрватите се сметаат себеси за спортски ориентирана нација, но на земјата й недостигаат спортски сали и стадиони во кои ќе можат да се одржат меѓународни настани.

Според премиерот Иво Санадер, успехот на хрватските атлетичари го овозможи отпочнувањето на еден ваков проект. „Арената ќе биде украс на Загреб, така што голема благодарност оди на сметка на хрватскиот ракометен тим“, рече Санадер на церемонијата на поставување темели претходно ова лето.

Веднаш откако Хрватска победи во кандидатурата за домаќин на Светскиот шампионат во ракомет, владата почна да планира како ќе го подготви настанот. Јасно беше дека мора да се изгради голем нов објект. Шампионатот се очекува да привлече повеќе од 15.000 обожаватели и загребската Арена ќе има капацитет за 16.000 места.

Плановите и 3Д макетата покажана пред јавноста ветуваат импресивна, модерна градба. Менаџерскиот тим на проектот беше на турнеја низ Европа и ги разгледа арените и собра совети и идеи за Загреб.

По шампионатот, арената ќе биде користена за најразлични активности -- фудбал, ракомет, кошарка, концерти, изложби, саеми и конвенции. Градењето претставува прва фаза од идниот Комплекс Арена, кој има тенденции да стане најголем трговски и забавен центар во Хрватска.