Романија: Новата сцена на Холивуд

02/08/2007

Спектакуларните предели во Романија и ниската цена на работната сила предизвикуваат сé поголем интерес помеѓу филмските работници.

Од Пол Кокиу за Southeast European Times во Букурешт – 02/08/07

Aктерката Никол Кидман беше во Романија да го снима „Студената планина“. [Getty Images]

Во последниве години Романија се претвори во филмски рај на Холивуд, во голема мера поради ниските цени. Сега во земјата се снимаат големи филмови, во кои настапуваат ликовите на Никол Кидман, Џуд Ло, Весли Снајпс, Рене Зелвегер и Жан-Клод ван Дам.

Две големи романски студија доживуваат невиден бум во бизнисот. Тоа се: „Кастел филм“, лоциран на 40 километри од Букурешт, во селото Колпани, и „Медиапро студиос“, кое се наоѓа во градот Буфтеа. Последниот е еден од најголемите медиумски и забавни групи во Источна Европа.

Пресвртницата, во поглед на интересот на Холивуд, беше „Студената планина“, приказна за Граѓанската војна во ридовите на Северна Каролина. Филмот, во кој играа Ло, Кидман и Зелвегер, беше снимен во Раснов, во југоисточна Трансилванија.

„Без заштедата што ја понуди Романија, „Студената планина“ апсолутно немаше да може да се снима“, рече продуцентот Алберт Бергер, кој проценува дека ниската цена на работната сила во земјата го намалила буџетот на филмот за повеќе од 20 милиони американски долари. Истиот би чинел повеќе од 100 милиони американски долари ако беше сниман во САД, вели Бергер.

Романското Министерство за надворешни работи, во меѓувреме, доби дозвола да ги искористи сцените од филмот во туристичката кампања емитувана на СНМ во 2004 година. Во рекламите филмскиот режисер Антони Мингела, ја фали земјата и нејзините нечепнати пејзажи.

Друг американски филм, „Модиглиани“ беше снимен во „Медиапро“. Во него настапи Енди Гарсија во улогата на прочуениот италијански сликар, и истиот чинеше 14 милиони евра. Кристофер Ламберт и Адријан Пол глумеа во „Хајлендер: Крај“, кој го снимаше „Кастел“. ББС, исто така, беше привлече ниски цени во Романија -- истиот го снимаше „Кралицата Мери на Шкотите“ таму. Романија, исто така, се цени како локација за документарците што се емитуваат на канали како што се: ЗДФ, Арте, Дискавери и „Нешнал џеографик“.

Странците сега трошат околу 50 милиони американски долари годишно за услугите за снимање филмови во Романија. Романија е нова членка на ЕУ и влијанието на пристапот врз индустријата останува да се види. Според експертите од оваа област, земјата може да очекува дека ќе остане рај за филмските работници и во годините што доаѓаат.