Новиот албански претседател положи свечена заклетва

25/07/2007

Политичкиот ќор-сокак кој се закануваше да ја втурне Албанија во предвремени избори заврши и земјата сега има нов претседател.

(AП, АФП, Ксинхуа - 24/07/07; Балканска мрежа на истражувачко новинарство, португалско претседателство на ЕУ - 23/07/07; Ројтерс, АП - 20/07/07)

Албанскиот претседател Бамир Топи (лево) положи свечена заклетва во вторникот (24-ти јули). [Гент Шкулаку]

Бамир Топи во вторникот (14-ти јули) положи свечена заклетва на функцијата претседател на Албанија. Тој вети дека ќе работи за евроатланската интеграција на земјата.

Заедно со Хрватска и Македонија, Албанија се надева дека ќе добие покана за влез во НАТО во 2008 година. Земјата потпиша Договор за стабилизација и асоцијација со ЕУ минатата година, со што го комплетираше првиот голем чекор на својот пат кон членството во блокот од 27 нации.

„Во денешно време сé мора да се промени додека се справуваме со новите историски предизвици на албанскиот народ“, рече Топи за време на церемонијата на положување свечената заклетва во вторникот вечер. Настанот започна со специјална пленарна седница на парламентот на земјата од 140 места и продолжи во Палатата на бригадите во Тирана.

Педесетгодишниот биолог и истражувач кој некогаш беше министер за земјоделство, е заменик-претседател на албанската владејачка Демократска партија. Тој беше избран за член на парламентот трипати по ред од крајот на комунизмот во 1991 година и се смета за умерен.

Неодамнешните анкети покажаа дека тој е најпопуларната фигура во политиката, според Балканската мрежа на истражувачко новинарство.

Топи доаѓа на местото на Алфред Мојсиу, чиј петгодишен мандат истече во вторникот.

Топи беше избран во петокот со поддршка од 85 од вкупно 91 пратеник што присуствуваа на седницата на која се гласаше. Трите претходни круга гласање не дадоа победник, бидејќи ниту еден од претседателските кандидати не успеа да го добие уставно потребниот минимум од 84 гласа. Во третата рунда гласање на 15-ти јули, Топи освои 50 гласa, додека неговиот левичарски противкандидат Неритан Чека освои 32.

Во петокот седум опозициски пратеници го игнорираа бојкотот на Социјалистичката партија, со што помогнаа да се стави крај на ќор-сокакот кој ја носеше земјата кон предвремени избори.

Потврдувајќи ја нивната поддршка за кандидатурата на Албанија за членство во ЕУ, министрите за надворешни работи на Унијата во понеделникот го поздравија успешниот изборен процес и ги повикаа „сите политички сили да работат заедно за напредок на потребните реформи“.

Топи, чија функција му дава овластување над судството и вооружените сили, вети обновување на политичката рамнотежа и унапредување на институционалните реформи.

„Ветувам дека ќе внесам рамнотежа во албанската политичка клима и ќе ги модернизирам нашите институции за да можеме да се соочиме со предизвиците на пристапот во ЕУ и НАТО“, Ројтерс ја цитираше неговата изјава пред пратениците во петокот.

Преземајќи ја функцијата во вторникот, Топи повика на единство и вети дека ќе остане над политичките партии и интереси. Тој, исто така, рече дека ќе поддржи мерки што на крајот ќе го зголемат кредибилитетот на политичарите.