РС, СИПА и ЕУПМ се здружија за безбедноста на комеморацијата за Сребреница

10/07/2007

Полициските агенции, во заедничка соработка, ќе се погрижат за безбедносните мерки за 12-годишнината од масакрот во Сребреница. Повеќе од 1.000 луѓе почнаа да се движат кон местото на најголемиот масакр во Европа по Втората светска војна.

Од Влатко Вукотиќ за Southeast European Times во Бања Лука -- 10/07/07

Полицијата на СИПА ќе му се приклучи на контингентот полицајци на Република Српска и на полицијата на ЕУПМ за безбедноста на комеморацијата. [Архива]

Вкупно 1.000 полицајци од Република Српска (РС), полициската мисија на ЕУ (ЕУПМ) и Државната агенција за истраги и безбедност (СИПА) ќе се погрижат за безбедноста на 12-годишнината од комеморацијата за Сребреница во Босна и Херцеговина (БиХ) в среда (11-ти јули).

Масакрот во Сребреница, кој Меѓународниот суд на правдата во март го прогласи за геноцид, ќе биде обележан со десетици илјадници присутни, вклучувајќи го и обвинителот на ОН за воени злосторства, Карла дел Понте, и поранешниот висок претставник во БиХ, Кристијан Шварц-Шилинг. Ќе бидат закопани остатоците на 446 жртви на масакрот -- кои беа идентификувани минатата година.

Безбедноста на комеморацијата беше предмет на несогласување минатиот месец, кога Шварц-Шилинг објави дека за тоа ќе се погрижи државата, наместо РС, која беше задолжена претходните години. Србите рекоа дека ќе одбијат го спроведат мандатот.

Новиот висок претставник Мирослав Лајчак, кој ја презеде функцијата минатата недела, ги повика локалните водачи да ги намалат тензиите околу ова прашање. „Ќе биде штетно за граѓаните на БиХ ако некој почне да прави политичка агенда на оваа трагедија“, рече словачкиот дипломат.

Безбедносниот план беше активиран минатата недела, кога повеќе од 1.000 луѓе, вклучувајќи ги и преживеаните од масакрот во 1995 година, почнаа тридневен марш од Сапна, во близина на Тузла, до Сребреница. Учесниците на маршот ќе запираат на секоја од 39-те масовни гробници откриени по војната. Заедно со граѓаните на БиХ, Французи, Германци, Холанѓани и Унгарци се приклучија на кампањата.

„Европската полиција ќе распореди десет мобилни тима во областа на Сребреница. Овие тимови ќе соработуваат со колегите од полицијата на РС и другите агенции во спроведувањето на законот, за сите настани да поминат во ред“, рече оперативниот советник на ЕУПМ за Сребреница, Јерге Силкенат.

По состанокот минатата недела со претставниците на здруженијата на жртвите и преживеаните, Лајчак рече дека злосторниците од Сребреница мора целосно да бидат изведени пред лицето на правдата и дека мора да се создадат услови за сите граѓани кои сакаат да се вратат во нормален живот.

Пред овогодинешната комеморација, УНДП одржа конференција за развојот на Сребреница. Федерацијата на БиХ, Србија, Канада, Грција и Холандија, Министерскиот совет на БиХ и округот Брчко ветија 36,5 милиони евра помош за Сребреница во текот на следните три години, на состанокот од 3-ти јули.

Покрај ова, Турција, Јапонија, Пакистан, САД и Норвешка, најавија инвестиции за развој на Сребреница, социјални прашања и отстранување на нагазните мини.