Со „Киро“ наспрема „Јубито“ политиката влезе во нова ера

28/06/2007

Јавните личности сега мора да водат сметка за видео-снимките, откако еден хрватски министер го искуси потешкиот пат.

Од Наташа Радиќ за Southeast European Times во Загреб -- 28/06/07

Опозицијата побара од хрватскиот министер за внатрешни работи, Ивица Кирин, да поднесе оставка. [AФП]

Хрватските социјалдемократи овој месец побараа оставка од министерот за внатрешни работи на земјата, обвинувајќи го дека ги прекршил законите во обид да открие кој поставил видео-клипови од неговите интервјуа и говори на „ЈуТјуб“. Актуелната сага ја фасцинираше земјата, но ја загрижи владата на премиерот Иво Санадер.

Ивица Кирин е најмладиот член на кабинетот на Санадер. Во политичките емисии во кои е гостин, тој се обидува да ги објасни проблемите со кои се соочува неговото министерство и резултатите постигнати досега. Главните теми се организираниот криминал и корупцијата.

Но, за време на интервјуата, Кирин се искажува на конфузен начин. Неговите гафови нашироко се коментираат во медиумите, а од неодамна се појави и видео-снимка на „ЈуТјуб“ -- со додаден хумористичен коментар.

За една недела клипот на „ЈуТјуб“ привлече повеќе од 250.000 гледачи. Хрватските медиуми го прогласија „Киро“ за ѕвезда на Интернетот. Но, на министерот не му беше смешно.

Во интервјуто што следеше, од Кирин беше побарано да даде коментар за изненадната Интернет популарност. Тој одговори цинично дека анонимните реклами мора да се генијални, а потоа погрешно го изговори името на „ЈуТјуб“.

Додека Кирин продолжи да коментира за „Јубито“ (ју-би-ту), стана јасно дека тој никогаш не чул за веб-страницата. Интернет-заедницата слатко се забавуваше, а Кирин доби нов прекар. Во продажба во продавниците и на Интернет се најдоа маици, шољи, па дури и долна облека со „Јубито“.

Ситуацијата го натера министерот да преземе законски дејства -- велејќи дека намерно погрешно го изговарал името и дека сака да го заштити „Јубито“ како своја интелектуална сопственост.

На крајот од мај, приказната почна да зазема посериозен правец, делумно и поради својот политички контекст. Во ноември Хрватите ќе излезат на гласање на општите избори. За првпат откако ја освои власта во 2003 година, Санадер и неговата владејачка партија ХДЗ заостануваат зад социјалдемократите.

Фијаското на „ЈуТјуб“ не помогна и Кирин тврди дека има докази оти опозицијата стои зад снимките. Со коментарите за медиумите тој покажа дека ги барал серверите на „ЈуТјуб“.

Сепак, неговиот став му создаде нови проблеми. Ако Кирин навистина започна истрага, каде добил овластување за тоа? Пратениците на СДП сега го обвинуваат Кирин дека ја искористил својата позиција и полициските средства за лична акција против сајбер-мачителите. Кирин повторно мораше да го објаснува очигледниот гаф. Тој ги обвини новинарите за погрешно толкување на неговите зборови.

Сега тој не дава интервјуа и избегнува да се појавува во јавноста. Сепак, славата на Кирин не е веќе поврзана само со „ЈуТјуб“. Тој сега се појави на уште една популарна веб-страница „Боинг боинг“. Досега министерот не дал коментар.