Судењето на поранешните генерали се очекува да биде тест за хрватското судство

09/05/2007

Двајцата пензионирани хрватски генерали -- Мирко Норац и Рахим Адеми -- ќе бидат судени следниот месец за воени злосторства.

Од Наташа Радиќ за Southeast European Times во Загреб – 09/05/07

Поранешниот хрватски генерал Рахим Адеми. [АФП]

Судењето на двајцата пензионирани хрватски генерали -- Рахим Адеми (52) и Мирко Норац (40) е закажано за 18-ти јуни. Многумина ова го сметаат за најголем тест со кое досега се соочило хрватското судство.

„Судењето ќе има девет рочишта пред летната пауза“, објави портпаролот на загребскиот жупански суд Крешимир Девчиќ. „Само обвинителите и одбранбените тимови на генералите се повикани на првите рочишта, додека сведочењата на сведоците ќе уследат по летото.“

Случајот, кој се однесува на воените злосторства наводно извршени за време на операцијата во септември 1993 година во т.н. Медачки џеб, беше првиот што го истражи Трибуналот на ОН во Хаг за воени злосторства, но подоцна му беше предаден на хрватското судство.

„Ова е првиот случај што Хашкиот трибунал му го предаде на хрватското судство, и ние ќе го следиме со интерес. Ова е уште еден тест-случај за тоа дали локалното судство е доволно зрело“, рече претставник на Европската комисија во Загреб. „За разлика од минатото, овојпат ние не очекуваме какви било протести или митинзи од страна на десничарските групи или воени ветерани и тоа е добар знак“, додаде претставникот.

Хрватска, сега кандидатка за членство во ЕУ, има лоши резултати од минатото во поглед на судењето на случаите на воени злосторства. Со судењето Адеми-Норац судството има шанса да покаже дека е доволно зрело да се справи со вакви случаи.

Обвинителите од Трибуналот на ОН ги следат судските процеси. Ако тие одлучат, во кој било момент, дека случајот не се води соодветно, тие имаат надлежност да го вратат во Хаг.

Според обвинението, Адеми и Норац „планирале, поттикнале, наредиле, извршиле или на друг начин помогнале во планирањето, подготвувањето или извршувањето на прогонот на српските цивили од Медачки џеб врз расни, политички или верски основи“.

Околу 400 српски цивили живееја таму пред да почне нападот на хрватската војска на 9-ти септември. Според обвинението „Медачки џеб стана непогоден за живеење“ како резултат на операцијата.

„Селата во Медачки џеб беа целосно уништени, со што српското цивилно население беше лишено од домовите и егзистенцијата“, пишува во истото.

Заради нивните рангови, Адеми и Норац „имале моќ, власт и одговорност да ги спречат или да ги казнат сериозните прекршувања на меѓународниот хуманитарен закон, извршени за време на операцијата Медачки џеб“, се вели во обвинението.

Норац веќе одлежа 12-годишна казна за воени злосторства против српските цивили. Неговото апсење и судење во 2001 година предизвика антивладини протести.

На Адеми, кој доброволно му се предаде на Хаг, му е забрането да го напушти местото на живеење или да разговара со новинари, додека го чека судењето.