Растат шпекулациите за предлогот на Ахтисари за статусот на Косово

09/01/2007

Од канцеларијата на меѓународниот претставник Марти Ахтисари велат дека неговиот предлог за иднината на Косово ќе биде готов до 21-ви јануари, датумот на изборите во Србија.

Од Блерта Фониќи-Кабаши за Southeast European Times во Приштина – 09/01/07

Многумина во Приштина и Белград се нестрпливи да дознаат каков ќе биде предлогот на меѓународниот претставник Марти Ахтисари за Косово. [Getty Images]

Минатата недела портпаролот на Марти Ахтисари потврди дека долго очекуваниот план на меѓународниот претставник за идниот статус на Косово ќе биде претставен по парламентарните избори во Србија на 21-ви јануари.

„Тој се наоѓа во крајните фази“, рече во четвртокот (4-ти јануари) Реми Дурло. „Планот сеуште не е финализиран, но ќе биде готов до 21-ви јануари, а ќе биде претставен по овој датум“. Се очекува Ахтисари да ги запознае членовите на Меѓународната контак група пред да им го открие својот план на Белград и Приштина.

Косовскиот премиер Агим Чеку рече дека е убеден дека Ахтисари ќе ги сумира своите крајни предлози за покраината и дека ќе му ги претстави истите на Советот за безбедност на ОН на крајот од февруари или почетокот на март. Во меѓувреме, продолжуваат шпекулациите за тоа што всушност ќе предложи Ахтисари.

Уредниците на австрискиот весник Дие Пресе, Вајленд Шнајдер и Норберт Риф, напишаа во четврточното издание дека очекуваат Ахтисари да предложи еден вид на „контролирана независност“ за Косово.

„Убедени сме дека пакетот на Ахтисари нема да не изненади“, рече заменик-шефот на УНМИК Стивен Шук по средбата со Чеку минатата недела. „Меѓутоа, откако ќе биде претставен, ние ќе го анализираме пакетот, а потоа преговарачкиот тим на Косово ќе ги соопшти своите ставови за него“.

Србија, која е против независност на Косово и наместо тоа се залага за „значителна автономија“, веќе предупреди дека ќе биде против било каков предлог кој не гарантира неприкосновеност на нејзините граници. „Ако Ахтисари „направи договор со албанските сепаратисти, српската влада ќе го отфрли како невалиден“, рече министерот за локална самоуправа Зоран Лочар.

За викендот, српскиот претседател Борис Тадиќ побара од Ахтисари да го одложи соопштувањето на неговиот предлог се додека не биде формирана нова влада во Белград. Тој рече дека неповолниот предлог може да ги загрози преговорите за коалиција во Србија.

Амбасадорот на Русија во Советот за безбедност на ОН, Витали Чуркин, рече во прес конференција минатата недела дека Косово нема да биде на агендата на Советот за безбедност за овој месец. „Ние Русите сметаме дека мора да им биде дадена шанса на двете страни да го продолжат дијалогот“, рече Чуркин. „Би било крајно опасно да се наметне нешто“.

Сепак, тој како да потврди дека предлогот на Ахтисари ќе биде поставен на маса наскоро. „Постои идеја дека Ахтсари ќе го претстави својот предлог за Косово веднаш по изборите во Србија“, рече тој.