Македонија воведе рамен данок

08/01/2007

Владата се надева да привлече странски инвестиции со значително намалување даночниот товар.

Од Зоран Николовски за Southeast European Times во Скопје -- 08/01/07

Властите се надеваат дека новиот систем ќе ја поттикне економијата во земјата. [Getty Images]

Годинава во тек е големо реструктуирање на македонскиот даночен систем. Како што беше ветено за време на изборите, владата ќе воведе рамен персонален данок и данок на добивка од 12 отсто. Во моментов, во функција се прогресивни стапки на персонален данок -- 15 отсто, 18 отсто и 24 отсто. Данокот на добивка е 15 отсто, данокот на имот 3 отсто и ДДВ 15 отсто.

Владата вели дека планира да оди и понатаму, намалувајќи го рамниот данок на 10 отсто во 2008-та година.

Експертите и финасиските институции велат дека новиот даночен систем најверојатно ќе има позитивно влиајние врз економијата, особено во однос на зголемени странски инвестиции. Наплаќањето на данокот ќе стане поефикасно, а со тоа ќе се отежни затајувањето на данок.

Сличните преструктуирања на даночните системи во други земји, особено во балтичките земји, покажаа корисни резултати. Сивата економија е намалена бидејќи бизнисите утврдија дека користа од избегнувањето на данокот е мала во споредба со ризикот.

Меѓутоа, владата ќе биде под притисок да практикува фискална дисциплина, имајќи го предвид потенцијалното намалување на приходите.

Претставници на ММФ неодамна ја посетија Македонија со цел да дискутираат за буџетот за 2007-та година и, според министерот за финансии Трајко Славевски, генерално се согласиле со промените на даночната политика. Меѓутоа, тие покажале загриженост за буџетскиот дефицит. Владата очекува значителен дефицит, додека пак Фондот би сакал тој дефицит да биде зауздан.

ММФ очекува овие разлики да бидат решени наскоро, дозволувајќи завршување во јануари на втората ревизија на стенд-бај договорот на Македонија со Фондот.

Марк Грифитс, шеф на делегацијата на ММФ, рече дека неговиот тим е задоволен од остварувањата на Македонија во макроекономската политика. Земјата има ниски стапки на инфлација, стабилна валута и економски раст од 2 на 4,6 отсто во период од дест години, рече тој. Структурните реформи се имплементираат, и покрај тоа што дојде до промена на владата на парламентарните избори.

Грифитс ја поздрави целта на владата за висок одржлив економски раст и помала невработеност притоа држејќи ја инфлацијата под контрола. Македонија се надева да го удвои стандардот на живеење во следните десет години, констатира тој.

Гувернерот на Народна Банка Петар Гошев предвидува инфлација од 3 отсто, стабилен девизен курс, како и пораст на резервите на странски валути до 1,7 милијарди американски долари во 2007-та.