Баросо препорача пауза во проширувањето на ЕУ по приемот на Бугарија и Романија

26/09/2006

Претседателот на Европската комисија, Жозе Мануел Баросо, во понеделникот рече дека треба да има пауза во процесот на проширување на ЕУ по влезот на Бугарија и Романија, со цел да му се овозможи на блокот да ги реши внатрешните институционални и уставни проблеми.

(AП, Ројтерс, АФП, ББС, Интернешнал хералд трибјун, АКИ, ЕУобсервер, ЕУполитикс - 25/09/06; Еурактив - 21/09/06; Фондација Бертелсман - 20/09/06)

Претседателот на ЕК, Жозе Мануел Баросо (десно), и францускиот премиер, Доминик де Вилпен, одржаа заедничка прес-конференција по нивниот состанок во понеделникот (25-ти септември) во Брисел. [Getty Images]

ЕУ не треба да прима нови членки по Бугарија и Романија, пред да ги спроведе институционалните реформи, рече во понеделникот (25-ти септември) претседателот на Европската комисија (ЕК) Жозе Мануел Баросо.

Тој го изјави ова еден ден пред ЕК да го објави својот последен извештај за двете балкански земји, во кој препорача тие да добијат дозвола за влез во ЕУ на 1-ви јануари 2007 година.

„Не би било паметно да се внесуваат други земји-членки освен Романија и Бугарија“, рече Баросо на прес-конференцијата во Брисел, по состанокот со францускиот премиер Доминик де Вилпен. „Не сме во позиција понатаму да ја интегрираме Европа без институционални реформи. Нашиот апсорпционен капацитет има одредени граници.“

Спогодбата во Ница, за која водачите на ЕУ постигнаа согласност на крајот од 2000 година, повеќе од две години пред да стапи на сила во февруари 2003 година, ја обврзува Унијата да ги спроведе институционалните реформи по приемот на својата 27-ма членка.

„Не можеме да продолжиме со проширувањето без да ги расчистиме институционалните прашања, гласањето и донесувањето на одлуките“, изјави Баросо за новинарите.

Предложената уставна спогодба на ЕУ би помогнала да се решат постојните проблеми и ограничувања за понатамошното проширување, но истата беше одложена откако холандските и француските гласачи ја отфрлија на одделните референдуми минатата година.

„До каде можеме да одиме без да предизвикаме неефикасност на ЕУ?“, запраша Де Вилпен, повторувајќи го повикот на Баросо за стопирање на понатамошното проширување. „Ни требаат принципи за правила пред да можеме да ги разгледаме понатамошните фази на проширувањето.“

Изјавата на Баросо во врска со уставната спогодба беше дадена неколку месеци откако водачите на ЕУ во јуни се согласија да се обидат да го решат актуелниот ќор-сокак до крајот на 2008 година.

Според бриселскиот ЕУобсервер, комесарите на ЕУ за комуникации и за регионална политика, Маргот Волстром и Данута Хубнер, в петок ќе се состанат со т.н. „Амато група“, на разговори чија цел ќе биде да се најде решение за ќор-сокакот предизвикан од холандското и француското „не“.

Во меѓувреме, земјата која ќе биде најпогодена од чекорите за решавање на институционалните проблеми на блокот е Хрватска, која заедно со Турција во октомври ги започна разговорите за членство во ЕУ со Брисел и се надева дека ќе го заврши тој процес до 2009 година.

Реформите кои ќе й овозможат на ЕУ да функционира ефикасно, најверојатно, ќе значат мало одложување во пристапот на Хрватска. Сепак, Баросо во понеделникот истакна дека би сакал земјата да се „приклучи што е можно побргу, ако ги исполни сите критериуми“.

Соочена со долга реформска агенда, Турција не се очекува да ги заврши своите преговори уште најмалку десет години.

Другите земји што се надеваат на влез во ЕУ се: Македонија, која доби официјален кандидатски статус во 2005 година, но не доби датум за почеток на своите разговори за членство, како и Албанија, Босна и Херцеговина, Црна Гора и Србија.