Првите 100 дена од владата на Чеку предизвикаа различни реакции

19/07/2006

Косовскиот премиер Агим Чеку говореше пред парламентот за првите 100 дена од доаѓањето на власт на неговата влада, но опозициските политичари ја бојкотираа седницата поради процедурална расправија. Во меѓувреме, граѓаните на Приштина даваат свое мислење за администрацијата на Чеку.

Од Берта Фониќи за Southeast European Times во Приштина – 19/07/06

Косовскиот премиер Агим Чеку. [Getty Images]

Косовските пратеници минатата недела го слушнаа излагањето на премиерот Агим Чеку за првите 100 дена од неговата влада. Голем дел од излагањето беше фокусиран на спроведувањето на стандардите поставени од ОН.

Во текот на изминатите три месеци се постигнати значителни резултати, рече премиерот, додавајќи дека Косово „е сосема подготвено да се соочи со првата фаза од постстатусниот период“. Неговата влада интензивно работи на исполнувањето на стандардите, зајакнувањето на безбедноста и политичката стабилност и финализирањето на статусот на Косово, рече Чеку.

Но, опозициските партии ја бојкотираа презентацијата, бидејќи нивниот предлог да му се даде на секој член десет минути за дискусија, не беше одобрен.

„Секој пратеник треба да има шанса да говори или да даде свој коментар на излагањето на Чеку, барем десет минути. За нас, два часа за сите дискусии е премногу кратко“, рече Јакуп Красниќи, шеф на парламентарната група на ПДК.

Според премиерот, бојкотот значи изгубена можност да се даде важна повратна реакција.

„Ние не сме заинтересирани да слушаме само пофалби“, рече Чеку. „Многу е важно за нас да слушнеме и критики, за да знаеме каде направивме пропуст, а каде имавме успех“, рече тој по седницата на 13-ти јули.

Граѓаните на Приштина, пак, имаат свои согледувања за администрацијата на Чеку. „Премиерот треба да дава извештај секој месец во парламентот за работата на владата ... Неговиот извештај треба да биде поконкретен“, вели наставникот во основно училиште Ибуш Јонузи.

Фризерката Магбуле Камбери се согласува. „Премиерот не треба да ги изнесува само успесите, туку и пропустите“, вели таа. „Сметам дека секој месец не само премиерот, туку и целата влада, треба да ни даваат важни информации - особено сега, кога е клучен период за Косово.“

Според Камбери, премиерот, исто така, треба да организира јавни дебати со граѓаните на Косово. „Во овие дебати, мислам дека повеќе треба да се дискутира околу извештајот за работата на владата“, додава таа.

Но, други граѓани велат дека Чеку и неговата влада веќе работат многу транспарентно. На владата й треба одреден степен на приватност за да функционира ефикасно, вели Јетулах Гаши, и не може да се очекува да се открие сé.

Некои граѓани се едноставно индиферентни кога станува збор за политичките прашања. „Мене не ме интересира што се случува во парламентот“, вели Бејтуш Џемајли, кој работи во мала продавница во близина на седиштето на УНМИК. „Јас сум земјоделец и ме интересира само мојата нива.“