Ѕвездата на НБА, Владе Дивац, й заби кош на српската влада

06/07/2006

Владе Дивац, познатиот поранешен кошаркар кој стана бизнисмен, постигна голема победа со пресудата на српскиот Врховен суд со која му се овозможува да го купи најтиражниот весник во земјата -- белградските „Вечерње новости“.

Од Георги Митев-Шантек за Southeast European Times во Белград - 06/07/06

Со одлуката на српскиот суд му се отвори можност на Владе Дивац да го купи белградскиот весник „Вечерње новости“. [ОН]

Поранешната ѕвезда на НБА, Владе Дивац, кој играше за „Чикаго булс“, „Сакраментно кингс“ и „ЛА Лејкерс“, го доби случајот против Министерството за економски прашања. Ова министерство е надлежно за српската Агенција за регистирање на бизниси, која одби да го регистира зголемувањето на акционерскиот капитал од страна на претпријатието на Дивац во белградскиот весник Вечерње новости.

Опструирајќи го она што вообичаено претставува техничко прашање, агенцијата се чини дека ја зазеде страната на оние кои сакаа да ја спречат приватизацијата на весникот, кој е познат по застапувањето на владината политика.

Според пресудата на Врховниот суд, агенцијата нема правна основа да ја спречи регистрационата процедура, и покрај актуелниот спор во врска со државниот удел во акциониот капитал. Сé уште не се знае дали државниот удел й припаѓа на Србија или на поранешната заедничка држава Србија и Црна Гора.

Делот кој Дивац беше спречен да го купи му беше доделен на група мали акционери предводени од главниот уредник на Вечерње новости и генералниот менаџер Манојло Вукотиќ.

Кошаркарската ѕвезда се побуни, велејќи дека потегот бил резултат на политички притисок од партијата на српскиот премиер Воислав Коштуница, која очигледно не сакаше да го загуби влијанието што го ужива преку најтиражниот весник во земјата.

Омилениот Дивац најпрво им понуди на акционерите 2.500 евра за акција, ветувајќи дека нема да влијае на уредничката политика, ниту, пак, дека ќе отпушти некого. Тој, сепак, рече дека тоа не е неговата последна понуда.

Според една независна ревизорска агенција, Вечерње новости се проценува на 30 милиони евра. Други заинтересирани за весникот се: Westdeutsche Allgemeine Zeitung, како и некои српски магнати. Германците нудат 3.500 евра за акција, но не се споменува социјалната програма, додека српските магнати не ја објавија јавно својата понуда.

Маневрирањето со зголемувањето на акционерскиот капитал наместо директното купување на акциите или преземање е на границата на легалноста. Но, ова е вообичаено во Србија, со оглед на тоа што владата и менаџментот на претпријатијата ги користат различните законски дупки за да ги спречат малите акционери да ги продадат своите акции на берзата.

Ова не прв конфликт на Дивац со српската влада. Претходно тој се обиде да го купи претпријатието за производство на најпродаваната минерална вода во Србија, „Књаз Милош“. Но, другите, меѓу кои и Комисијата за хартии од вредност, лобистите и странските амбасади, го блокираа. Претпријатието на крајот беше купено од фонд со седиште во Кејманските острови.

Невозможно е да се поднесе жалба на одлуката на Врховниот суд. Владата или ќе дејствува брзо и ќе ги избере купувачот или ќе мора да го прифати фактот дека Дивац, врз кого нема влијание, конечно ќе купи нешто во Србија.