Македонската армија ја укина воената обврска

21/04/2006

Армијата на Република Македонија ќе се професионализира почнувајќи од октомври оваа година, кога и последната класа воени регрути ќе го завршат отслужувањето на задолжителниот воен рок. Со ова, Македонија ќе стане прва земја од Западен Балкан што става крај на воената обврска.

Од Зоран Николовски за Southeast European Times во Скопје -- 21/04/06

Македонската армија ќе биде прва во регионот што целосно ќе биде составена од професионални војници. [Getty Images]

Армијата на Република Македонија (АРМ) ќе стане првата армија во Западен Балкан што ја укинува воената обврска и целосно ќе се состои од професионални војници и доброволци, според новиот план објавен претходно овој месец. Задолжителниот воениот рок постепено се укинува и априлската класа воени регрути која веќе го отслужува воениот рок ќе биде последна. Тие завршуваат со воената обврска во октомври.

Овие измени се дел од целокупната реформска стратегија во одбраната, со цел создавање на мала, флексибилна и доброопремена армија, која може да се соочи со новите асиметрични безбедносни закани и да учествува во меѓународните мировни мисии.

„За АРМ и Министерството за одбрана, ова значи напуштање на непрофесионалниот модел и воведување на модел по НАТО стандарди“, изјави министерот за одбрана, Јован Манасиевски, за новинарите. Тој рече дека чекорите се преземаат однапред и дека истите се резултат на напредокот во одбранбените реформи.

Класата доброволни војници ќе го надополнуваат професионалниот армиски персонал. Доброволците ќе имаат тримесечна обука и на најдобрите ќе им се дозволи да бидат професионални војници. Доброволната класа ќе биде отворена за сите мажи и жени помлади од 26 години.

„Претходно, околу 13.000 млади лица имаа обврска да отслужат воен рок“, рече Манасиевски. „Со новиот модел се ослободуваат дополнителни средства што ќе бидат добредојдени за професионална војска и намалување на армијата. Истовремено, младите луѓе се ослободуваат од една сериозна обврска.“

Министерството, исто така, ја укинува и можноста за цивилно отслужување на воениот рок, како алтернатива за воената обврска. Според Манасиевски, ова не даде никакви резултати, а ги зголеми трошоците.

За укинувањето на задолжителната воена обврска беше разговарано на состанокот на државниот Совет за безбедност пред една година.