Граничен премин во Македонија реновиран со проектот што го финансираше Светската банка

18/04/2006

Времето на чекање на фрекфентниот македонски граничен премин Табановце треба значително да се намали како резултат на проектот за реновирање, финансиран од владата и Светската банка.

Од Марина Стојановска за Southeast European Times во Скопје - 18/04/06

Реновираниот граничен премин Табановце беше отворен на 12-ти април. [Томислав Георгиев]

Новоизградениот граничен премин кај Табановце, кој ја поврзува Македонија со соседна Србија, беше отворен на 12-ти април во рамките на Регионалната програма за олеснување на трговијата и транспортот во Југоисточна Европа (ТТФСЕ). Владата и Светската банка го финансираа проектот.

Табановце е еден од најфрекфентните гранични премини, низ кој поминуваат и по 700.000 возила и 2,5 до 2,8 милиони патници годишно. Реновираниот премин, кој има шест излезни ленти од Македонија и осум влезни ленти за Македонија, би требало да помогне во подобрувањето на ефикасноста. Изградени се нова полициска и царинска зграда, како и помошни објекти - како што се потстаници и агрегати на дизел.

„Транспортните трошоци во Македонија се повисоки од оние во другите земји за 10 до 20 отсто, поради тоа што земјата е опколена со копно“, рече Сандра Блуменкамп, претставничка на Светската банка за Македонија, на церемонијата на отворање на 12-ти април. „Ова се одразува на транспортерите. Затоа, земјата треба да стори сé што е во нејзина моќ за да ги намали овие трошоци. Модернизацијата на граничниот премин е само еден сегмент“. Таквите напори, рече Блуменкамп, ќе ги привлечат и инвеститорите.

„Проектот за олеснување на транспортот кој ги обединува земјите во Југоисточна Европа, има за цел да ја олесни трговијата и да осигури брз проток на стока и патници и да ја спречи корупцијата“, рече министерот за финансии, Никола Поповски. Што се однесува до новиот граничен премин, тој рече дека „Измените осигуруваат поповолна клима за инвестициите во целиот регион и отворена и конкурентна економија. Овој премин е дел од Коридорот 10 и е многу важен во меѓународната трговија.“

Програмата ТТФСЕ има за цел намалување на бесцаринските трошоци за трговијата и транспортот, како и спречување на шверцот и корупцијата. Истата има за цел и промовирање на полесен и поевтин трговски протек низ границите во Југоисточна Европа, како и доближување на царинските процедури до стандардите на ЕУ. Програмата, исто така, ги вклучува и Албанија, Босна и Херцеговина, Бугарија, Хрватска, Молдавија, Романија и Србија и Црна Гора. ТТФСЕ претставува здружен напор на владите од овие земји и Иницијативата за соработка во Југоисточна Европа (СЕЦИ), Светската банка, ЕУ и САД.