Албанија и Израел ќе ги зајакнат односите

28/03/2006

Изгледите за поголема соработка беа главната цел на неодамнешната посета на делегацијата на израелското Министерство за надворешни работи, предводено од заменик-директорот на министерството, амбасадорот Марк Софер.

Од Ерлис Селимај за Southeast European Times во Тирана – 28/03/06

„Се надеваме на зајакнување на односите во областа на маркетингот, здравството и земјоделството. Овие полиња се идентификувани како интересни сфери за двете земји“, рече израелскиот дипломат Марк Софер. [Архива]

Албанија и Израел се залагаат за зајакнување на нивните политички и економски врски, при што израелските претпријатија ги разгледуваат можностите за инвесирање во голем број области, меѓу кои и телекомуникациите, здравството, енергијата и високата технологија. Изгледите за поголема соработка беа истакнати за време на посетата претходно овој месец на делегација на израелското Министерство за надворешни работи, предводено од заменик-директорот на министерството, амбасадорот Марк Софер.

„Израел и Албанија имаа добри односи во овие 15 години и ние во Тирана потпишавме договор за економска и политичка соработка помеѓу двете земји. Со албанските претставници разговаравме и за ситуацијата на Средниот Исток и на Балканот, клучни прашања за двете земји“, изјави Софер за албанските медиуми.

За време на посетата на Тирана делегацијата се состана со албанскиот заменик-министер за надворешни работи, Едит Харџи.

Според Софер, неколку израелски претпријатија веќе работат во Албанија, главно во земјоделскиот сектор.

„Се надеваме на зајакнување на врските во маркетингот, здравството и земјоделството“, рече Софер. „Овие полиња се идентификувани како интересни сфери за двете земји“, додаде тој, споменувајќи ги и проектите за компјутеризација на училиштата, како и подобрување на инфраструктурата и телекомуникациите.

Делегацијата го пренесе интересот на израелските претпријатија во енергетскиот сектор, туризмот, агро-индустријата и други области. Истата вети и помош во изградбата на археолошко-културниот парк во Саранда.

Покрај тоа, двете страни разговараа за зајакнувањето на политичкиот дијалог и организирањето на регуларни годишни консултации.

За време на неговата посета Софер говореше за историските врски со Албанија.

„Не само во Израел, туку и низ целиот свет, Евреите й се воодушевуваат на Албанија. Не само за периодот на Втората светска војна, кога Албанија ги спаси Евреите, туку и поради тоа што земјата е добро позната по својата почит кон нас. Можам да кажам дека Албанија никогаш немала антисемитизам“, рече тој.

Албанија моментно има дипломатско претставништво во Тел Авив, додека Израел навести дека планира да отвори амбасада во Тирана во блиска иднина.