Албанија презема мерки против имотот на терористите

24/10/2005

По десетмесечно одложување албанските власти го запленија имотот во центарот на Тирана, кој беше користен за финансиските активности на терористичката мрежа на Ал каеда.

Од Ерлис Селимај за Southeast European Times во Тирана – 24/10/05

Властите на 18-ти октомври ги презедоа просториите во „Кулите близначки“ во Тирана, сопственост на Јасин ал-Кади, саудиски бизнисмен во бегство. [Гент Шкулаку]

Албанските власти во вторникот (18-ти октомври) ги презедоа деловните простории во таканаречените „Кули близначки“, во центарот на Тирана. Во 2004 година владата потврди дека оваа локација била користена за финансиските активности на терористичката мрежа на Ал каеда.

Преземените простории се сопственост на бизнисменот од Саудиска Арабија, Јасин Кади, кој беше прогласен за специјален глобален терорист од страна на американското Министерство за финансии во октомври 2001 година.

Кади поседуваше 18 отсто од акциите во двете згради, кои се наоѓаат наспроти кабинетот на албанскиот премиер.

„Процедурите на одземање на имотот се засноваат на одлуката на Министерскиот совет од 3-ти декември 2004 година, во рамките на мерките за спречување на терористичкото финансирање. И покрај тоа што поминаа десет месеци од донесувањето на одлуката, истата досега не беше спроведена“, се вели во известувањето за медиумите на Министерството за финансии.

Според министерството, просториите нема да бидат продадени туку ќе бидат менаџирани од страна на државните власти. Постои опција и за нивно изнајмување на државните институции или на приватни претпријатија.

Како владата така и опозицијата сакаат да покажат дека сериозно го сфаќаат проблемот поврзан со терористите. Претходно оваа година опозициската Социјалистичка партија вети дека ќе побара истрага за тоа како илјадници странци - вклучувајќи и луѓе, наводно, поврзани со Осама бин Ладен - можеле да добијат албанско државјанство во изминативе 13 години.

Се смета дека Кади имал блиски врски со Абдул Латиф Салех, кој, пак, има двојно - јорданско и албанско државјанство, и кого американското Министерство за финансии го прогласи за поддржувач на Ал каеда. Според Вашингтон, тој е поврзан со голем број албански невладини организации поврзани со египетскиот „Исламски џихад“ - група која има врски со Ал каеда - и добил 600.000 американски долари од Осама бин Ладен за да формира екстремистички групи во Албанија.

Салех основал албанска џихад организација, финансирана од страна на фондацијата Ал Харамаин, со цел да ја дестабилизира Албанија „поттикнувајќи конфликти помеѓу различните религиозни групи во земјата“, се вели во соопштението на американското Министерство за финансии.

Покрај тоа, Салех и Кади имале и неколку заеднички бизниси, вклучувајќи и увоз на шеќер, медицинско претпријатие и градежно претпријатие. „Салех бил главен менаџер на сите бизниси на Кади во Албанија, и, наводно, поседува 10 отсто од инвестициите на групата „Кади“ во Албанија“, вели министерството.