Македонија се бори против ширењето на лесно оружје

29/07/2005

Според проценките, во Македонија има помеѓу 80.000 и 170.000 парчиња нелегално лесно оружје. Владата презеде серија иницијативи чија цел е борбата против ширењето на ваквото оружје.

Од Зоран Николовски за Southeast European Times во Скопје – 29/07/05

Минатата година во Македонија беа запленети 1.314 парчиња лесно оружје. Според Министерството за внатрешни работи, бројот на смртните случаи предизвикани од ваквото оружје е намален за 25 отсто. [AФП]

Претходно овој месец Македонија го одбележа Меѓународниот ден за уништување на оружјето со специјалниот настан организиран од Министерството за внатрешни работи и УНДП. Вкупно 3.100 парчиња лесно оружје -- автоматски пушки, пушки, минофрлачи, на дури и лансери на проектили -- беа уништени во печките на „Макстил“ во Скопје.

Оружјето беше запленето во различни акции на Министерството за внатрешни работи.

„Лесното оружје ги дестабилизира регионите, охрабрува конфликти и ги поткопува мировните иницијативи“, рече Консуело Видал, заменик-претседател на УНДП во Македонија, на настанот на 9-ти јули.

„Нелегалното оружје претставува закана за мирот и безбедноста“, рече Цане Чапраговски, директорот на јавната безбедност во Македонија, задолжен за уништувањето на оружјето. „Денес уништивме 3.100 парчиња оружје кое ќе веќе никогаш нема да биде употребено и нема никого да повреди.“

По меѓуетничкиот конфликт во 2001 година Министерството за внатрешни работи започна серија активности за спречување на ширењето на нелегалното оружје. Во 2003 година беше спроведена акција за разоружување. Истовремено, беа изменети законите и беа заострени казните. Според законот, секој кој ќе биде фатен дека поседува нелегално оружје би можел да добие казна затвор во траење од една до десет години.

Минатата година во Македонија беа запленети 1.314 такви парчиња оружје. Според Министерството за внатрешни работи, бројот на смртните случаи предизвикани од лесно оружје оттогаш се намалил за 25 отсто.

На семинарот на УНДП минатата година проект-менаџерот на Програмата за контрола на лесното оружје, Алан Лапон, рече дека во Македонија има околу 110.000 до 170.000 парчиња нелегално оружје. Но, македонските експерти даваат помали цифри -- околу 80.000 парчиња. Ширењето на таквото оружје во голема мера е резултат на конфликтите кои следеа по распадот на поранешна Југославија.

Според ОН, во светот има околу 639 милиони парчиња лесно оружје, а едно од десет лица поседува повеќе од едно парче. Лесното оружје убива околу 500.000 лица -- еден човек на минута -- годишно или едно лице умира секоја минута во светот. Околу 300.000 такви смртни случаи се резултат на вооружените конфликти, додека 200.000 се резултат на убиство или самоубиство.