Во БиХ отворен Центар за обука за операциите за поддршка на мирот

21/04/2005

Во кампот Бутмир во Сараево овој месец е отворен нов Центар за обука за операциите за поддршка на мирот. Тоа е првата меѓународна институција поврзана со одбраната во Босна и Херцеговина во која членовите на вооружените сили на оваа земја работат рамо до рамо со своите колеги од партнерските нации.

Од Антонио Прленда за Southeast European Times во Сараево – 21/04/05

Босански воен офицер пред ЦООПМ. [Антонио Прленда]

Со помош на Велика Британија и 11 донаторски земји Босна и Херцеговина (БиХ) официјално го отвори меѓународниот Центар за обука за операциите за поддршка на мирот (ЦООПМ) на 14-ти април во кампот Бутмир во Сараево.

Центарот, со кој управува данскиот армиски бригаден генерал Хенинг Броекман-Ларсен, ќе спроведува обука од светска класа за операциите за поддршка на мирот за босанските и странските офицери. Целта на центарот е здобивање на идните водачи со раководни способности и воена филозофија заснована на меѓународно прифатена доктрина за поддршка на мировни операции.

Првиот курс се одржа во периодот помеѓу 7-ми февруари и 1-ви април и низ него поминаа 32 офицери од БиХ, како и од шест други партнерски земји.

„Ова е прва меѓународна институција во БиХ поврзана со одбраната во која припадниците на армиските сили на БиХ работат рамо до рамо со нивните колеги од партнерските нации“, рече министерот за одбрана на БиХ Никола Радовановиќ на церемонијата на отворање. „Обуката што ја нуди ЦООПМ ни овозможува да го подобриме, како во квантитет така и во квалитет, придонесот на БиХ во меѓународниот мир и стабилност, што е една од трите главни мисии на вооружените сили.“

БиХ неодамна ја распореди својата петта ротација на деветте воени набљудувачи во ОН во операцијата за поддршка на мирот во Етиопија и Еритреа, како и пет воени набљудувачи во третата ротација на мисијата на ОН во Демократската Република Конго, истовремено подготвувајќи единица за отстранување на експлозивни направи во Ирак.

„Овие активности покажуваат дека БиХ сé повеќе презема обврски како член на меѓународната заедница“, рече Радовановиќ.

ЦООПМ ќе спроведува три осумнеделни курсеви за обука годишно за потполковници, капетани и некои помлади мајори. На секој курс ќе има по 40 студенти, од кои околу 25 отсто ќе бидат меѓународни студенти. Основен курс е Курсот за персонал за операциите за поддршка на мирот (ОПМ). Ќе бидат развиени и други курсеви, како што се специјалистички семинари за високи офицери и нови курсеви и семинари што се од корист за вооружените сили во БиХ или другите делови од безбедносниот сектор на БиХ. Водечкиот персонал доаѓа од партнерските нации, додека петмина воени офицери се од БиХ.

„Ние сакаме овој центар да прерасне во центар што ќе обучува и офицери од соседните земји за операциите за поддршка на мирот“, рече Броекман-Ларсен. „Во тој однос, јас сум мошне задоволен што Словенија, Хрватска, Србија и Црна Гора, Албанија и Македонија ја прифатија поканата за испраќање на млади офицери за обука во ОПМ тука.“

Трошоците на составувањето на ЦООПМ изнесуваат околу 3 милиони евра. Велика Британија го водеше проектот, со донаторска помош од Данска, Финска, Франција, Унгарија, Холандија, Норвешка, Полска, Шведска, Швајцарија, Турција и САД. Во текот на следните години вооружените сили на БиХ постепено ќе ја преземат водечката улога во ЦООПМ.