Историскиот центар на Букурешт ќе биде реконструиран

17/02/2005

Реновирањето на центарот на Букурешт треба да започне ова лето. До датумот кога Романија ќе стане членка на ЕУ нејзиниот главен град ќе има почист и поатрактивен центар.

Од Разван Амариеи за Southeast European Times во Букурешт – 17/02/05

Реконструкцијата на центарот на Букурешт се планира да започне ова лето и ќе трае 18 месеци. [Архива]

Центарот на Букурешт наскоро ќе стане големо градилиште, со започнувањето на амбициозниот проект за негова реконструкција. Кога ќе биде комплетиран проектот, центарот на градот на површина од 57 хектари - за кој се смета дека има значителен трговски потенцијал - ќе има реновирани згради, нов водовод, систем за гас и канализација, улици без дупки, делови само за пешаци, подобри паркинзи и уште многу во смисла на продавници, барови и ресторани.

Работите треба да започнат ова лето и ќе траат 18 месеци. Крајниот рок е 1-ви јануари 2007 година, денот кога Романија треба да влезе во ЕУ. Трошоците за проектот, кои изнесуваат околу 28 милиони евра, ќе бидат обезбедени главно од странски извори, вклучувајќи и кредит од ЕБРД и субвенција од програмата ФАРЕ на ЕУ, како и од градоначалничкиот буџет на Букурешт.

Според општинските власти реконструкцијата има за цел „обнова на поранешниот аспект на областа, но со модерни објекти“, преку зачувување на археолошкото и архитектонското наследство со истовремено поттикнување на реновирањето на приватните згради. Локалните власти ветија изземање од даноци за оние кои ќе ги реновираат своите куќи во историскиот центар. „Тоа би требало да биде поддршка за оние кои инвестираат во реновирањето“, рече Ливиу Негоита, градоначалникот на третата област на Букурешт.

Нашите цели вклучуваат намалување на загадувањето и метежот во сообраќајот и помагање на ревитализацијата на традиционалните бизниси во оваа област.

За време на комунизмот, историскиот центар - кој содржи станбени згради стари повеќе стотоци години, рушевините на кралскиот суд изграден пред повеќе од пет века од страна на императорот Влад д Импалер и средовековните цркви и гостилници - беа запоставени. Становите беа национализирани и станаа општествени. Продавниците, рестораните и канцелариите беа, исто така, конфискувани и областа го загуби својот старовремски шарм.

По падот на режимот во 1989 година малку работи се променија. „Стандардот на трговските активности во оваа област континуирано се намалуваше, при што единствен позначаен елемент беше отворањето на некои спортски простори во засводените подруми на зградите од 19-тиот век“, вели архитектот Владимир Винеа. „Поголем дел од проблемите на Букуреш со домувањето се поврзани со историскиот центар - физичка деградација, несигурен правен статус или незаконско користење на некои згради и станови.“

Покрај тоа, лошата состојба со транспортот, комуналните претпријатија и комуникациската инфраструктура ги обесхрабрија големите инвестирања во оваа област. Ова драстично ќе се смени на подобро во текот на следните две години, ветуваат властите.

„Мора да почнеме со работата што е можно побргу со цел да ја спречиме деградацијата на историскиот центар. Оваа област е бизнис картата на Букурешт“, рече романскиот претседател Трајан Башеску.