Судот за воени злосторства во БиХ ќе ги преземе случаите овој месец

08/02/2005

Предавањето на зградата со безбедната судница претставува последниот чекор во 15-месечниот проект за судење на случаите на воени злосторства во БиХ.

Од Бет Кампшрор за Southeast European Times во Сараево - 08/02/05

Првиот случај треба да започне во новата судница до средината на овој месец, изјави министерот за правда на БиХ, Слободан Ковач. [Бет Кампшрор]

Свежо бојадисаната зграда со сосема нова безбедна судница им беше предадена на судските власти на Босна и Херцеговина (БиХ) на 26-ти јануари, со што е отворен патот за отпочнување на преземањето на случаите за воени злосторства од страна на судот на земјата подоцна овој месец.

„Оваа зграда, исто така, ќе послужи за судење на воени злосторства, олеснувајќи го градењето на одржлив и траен мир во оваа земја“, рече шефот на делегацијата на Европската комисија (ЕК) во БиХ, Мајкл Хемфрис.

Реновирањето на зградата во комплексот на државниот суд во Сараево, кое чинеше 2,2 милиони евра и го финансираше ЕК, претставува последниот дел од подготовките на судот за воени злосторства во БиХ за судење на случаите од конфликтот во периодот 1992-1995 година.

Планот за отворање на суд за воени злосторства во рамките на државниот суд на БиХ, кој започна сериозно во есента 2003 година, беше поттикнат од притисокот од страна на Меѓународниот кривичен трибунал за поранешна Југославија (МКТЈ) за комплетирање на својата работа до 2010 година.

Стратегијата на Трибуналот вклучуваше континуитет во судењето на високи воени и политички водачи, а судот во БиХ да ги суди луѓето и случаите од средните и ниските класи. И покрај преземањето на случаите предадени од страна на МКТЈ, обвинителите на судот во БиХ, исто така, ќе покренуваат обвиненија кои ќе произлегуваат од нивните сопствени истраги.

Осум меѓународни судии и пет меѓународни обвинители ќе работат заедно со судиите и обвинителите од БиХ во текот на транзициониот период од неколку години. Во тек се наименувањата на судските позиции.

Што се однесува на самите случаи, обвинителската канцеларија на БиХ ги разгледува досиејата испратени од МКТЈ и ги подредува во категориите „чувствителни“ и „многу чувствителни“, според критериумот за кој беше постигната согласност од страна на конзорциумот на професионалци од правниот систем на БиХ, МКТЈ и Канцеларијата на високиот претставник. Многу чувствителните досиеја -- на пример: геноцид, мачење, повеќекратни убиства и повеќекратни силувања -- ќе му бидат предадени на државниот суд. Чувствителните случаи ќе одат во судовите на ентитетот, кантонските и општинските судови.

Судењето на првиот случај треба да започне во новата судница до средината на овој месец, рече министерот за правда на БиХ, Слобода Ковач.

„Има мал проблем со единицата за притвор и затвор, но откако [ќе се разработи] новата логистика проблемот ќе биде решен“, рече тој.

Во рамките на проектот за судот за воени злосторства најпрво беше предложено градење на нов затвор под покровителство на централната Влада, со оглед на тоа што затворите во БиХ моментално се под покровителство на двата ентитета. Кога се покажа дека тоа е скапо, планерите се изборија за изградба на привремен затвор од 31 легло во комплексот судски згради, кој е сега скоро завршен. Тој треба да биде готов за затворениците до започнувањето на работата на судот.

Со оглед на фактот што планот за судот за воени злосторства беше обелоденет пред една година, Ковач рече дека проектот брзо напредува. Финансиската и техничката помош од меѓународната заедница се покажа како основна, рече тој.

„Ова е сосема нова ситуација и ние сме изненадени од напредокот кој е постигнат во кус период, во однос на материјалните и процедуралните услови за спроведување на случаите“, рече тој.