Според Европскиот центар за малцински прашања, учењето на јазиците во Македонија би можело да го зајакне меѓуетничкото разбирање

06/01/2005

Работната група за образование препорачува воведување на алтернативно билингвално образование во македонскиот образовен систем. Заедничките активности надвор од наставниот план и изучувањето на два или повеќе јазици ќе помогне во промовирањето на подобро разбирање помеѓу етничките заедници, вели групата.

Од Марија Лазарова за Southeast European Times во Скопје -- 06/01/05

Работната група препорачува учениците кои учат на македонски јазик да научат уште еден од јазиците на етничките заедници во земјата. [AФП]

Во новиот извештај работната група за образование на Иницијативата за политички дијалот на Европскиот центар за малцински прашања во Скопје (ЕЦМП) повикува на воведување на алтернативно билингвално образование во Македонија. За промовирање на подобро разбирање помеѓу етничките заедници, вели групата, училиштата треба да воведат заеднички активности надвор од наставните програми со изучување на два или повеќе јазици.

Извештајот, објавен во декември, препорачува училиштата да бараат од учениците кои учат на македонски јазик да изучуваат барем уште еден јазик на етничките заедници во Македонија. Во регионите со втор официјален јазик изучувањето на вториот јазик треба да биде задолжително, вели групата.

Според Мајкл Шчпорлук, политички советник во ЕЦМП, експертите во тимот не само што предложиле изучување на албанскиот јазик, туку и на сите јазици на етничките заедници во средините каде што е во употреба втор официјален јазик. „Една од препораките е, исто така, повисок квалитет на изучувањето на македонскиот јазик од страна на учениците од другите етничките заедници“, рече Шчпорлук.

Препораките се испратени до македонското Министерство за образование, Бирото за развој на образованието и Администрацијата за развој на јазиците на заедниците, како и до Парламентот. Соња Липиткова, претседател на парламентарната Комисија за образование, потврди дека комисијата дискутира за овој извештај. Ниту еден од членовите на комисијата кои присуствувале на состанокот не изразил негативно мислење за препораките, рече таа.

„ЕЦМП работи на подобрување на статусот на малцинствата“, рече Константин Петковски, заменик-директорот на Бирото за развој на образованието и член на работната група. „Со овие сугестии членовите на ЕЦМП сакаат да го подобрат мултикултурализмот и да ги отфрлат стереотипите во образованието.“

Групата, исто така, препорача студентите да учат за културата и традициите на другите етнички заедници и учебниците да претставуваат одраз на мултикултурната средина.