OН, ЕУ и САД го поздравија повикот на Тадиќ до косовските Срби

07/10/2004

Повикот на српскиот претседател Борис Тадиќ за учество на косовските Срби на парламентарните избори на 23-ти октомври беше пречекан со недвосмислена поддршка од официјалните претставници на ОН, ЕУ и САД.

(АФП, Ројтерс, АП, Скотсмен, ББС, ОН, ЕУ, Вашингтон фајл - 06/10/04)

Француски војници скокаат од падобран во селото Становце, Косово, северно од Приштина, во средата (6-ти октомври). [Лаура Хасани]

Официјалните претставници на ОН, ЕУ и САД во средата (6-ти октомври) го поздравија повикот на српскиот претседател Борис Тадиќ до косовските Срби за учество на парламентарните избори во провинцијата на 23-ти октомври.

„Ги повикувам Србите од Косово да земат учество на овие избори“, рече Тадиќ на државната телевизија РТС доцна во вторникот, посочувајќи, исто така, и краен рок за воспоставување на меѓународно признаена домашна власт во енклавите на косовските Срби. Ако ова не се случи во следните 90 дена од формирањето на привремената влада на провинцијата, Тадиќ рече дека лично ќе побара од пратениците на косовските Срби тие да се повлечат од парламентот.

Тадиќ, кој сака српските локални власти да ја контролираат полицијата, судството, здравствениот и образовниот систем во енклавите, истакна дека учеството во демократскиот процес преставува единствен начин за постигнување на таа цел.

Поздравувајќи го повикот на претседателот, шефот на УНМИК, Сорен Јесен-Петерсен, во средата рече дека учеството на косовските Срби на претстојните избори ќе „го отвори патот за нивната застапеност во локалните институции и ќе овозможи конструктивен дијалог за решавање на нивните грижи“.

„Нема замена за директното учество во демократските институции кои носат одлуки што влијаат врз животите на сите луѓе во Косово“, рече тој.

Официјалните претставници на ЕУ и на САД му се приклучија на Јесен-Петерсен во поздравувањето на повикот на Тадиќ за учество на косовските Срби на изборите. Шефот за надворешна политика на ЕУ, Хавиер Солана, ги пофали српските водачи за „мошне храбрата одлука“, додека заменик-портпаролот на американскиот Стејт департмент, Адам Ерели, рече дека целосното учество на Србите на изборите претставува најдобар начин да се осигури дека нивните грижи ќе се решаваат и нивниот глас ќе се слуша.

Сепак, повикот на Тадиќ беше жестоко критикуван од страна на Владата на српскиот премиер Воислав Коштуница, кој од косовските Срби побара тие да ги бојкотираат изборите. Членовите на Социјалистичката партија на поранешниот југословенски претседател Слободан Милошевиќ и ултранационалистичката Српска радикална партија (СРС), исто така, го нападнаа Тадиќ. Тврдејќи дека излегол од рамките на своите надлежности, СРС во средата покрена иницијатива во Парламентот за негова интерпелација.

Во меѓувреме, околу 360 француски војници во средата во Косово скокаа со падобран, како дел од „Операција решителна посветеност 2004“ за засилување на КФОР пред изборите. Вкупно 2.000 дополнителни војници ќе бидат распоредени во Косово до 6-ти ноември. Германија и Италија, исто така, ќе придонесат со свои војници, кои се очекува да пристигнат во текот на следната недела.