Според еден извештај Македонија е на третото место во светот според присуството на токсичен отпад

29/09/2004

Според новиот извешта на Организацијата за храна и земјоделство на ОН (УНФАО), Македонија е на третото место во светот според количината на токсичен отпад. Последиците по животната средина би можеле да се катастрофални, предупредуваат експертите.

Од Марија Лазарова за Southeast European Times во Скопје - 29/09/04

Според извештајот на Организацијата за храна и земјоделство на ОН, Македонија се наоѓа на третото место во однос на присуството на токсичен отпад. [УНФАО]

Во неодамна објавениот извештај на Организацијата за храна и земјоделство на ОН (УНФАО) Македонија е ставена на третото место во светот во однос на присуството на токсичниот отпад, со 10.000 тони. Само Украина и Полска се пред неа, со 19.500 тони, односно 15.000 тони.

Според директорот на УНФАО, Марк Дејвис, проблемот е, главно, предизвикан од околностите во кои се чуваат хемикалиите. „Ова се многу стари и токсични материјали поради тоа што се чувани долго време и честопати се чувани во лоши услови и на отворено“, изјави Дејвис за дневниот весник Утрински весник. „Тие можеби веќе испуштаат отрови и ја загадуваат водата во реките и езерата, обработливото земјиште и воздухот.“

Всушност, рече Дејвис, проблемот можеби е многу полош отколку што покажуваат бројките на УНФАО. „Искуството покажува дека кога се прави детална студија за земјата, бројките се најмалку двојно повисоки.“ Токсичниот отпад е причина за голем број здравствени проблеми - вклучувајќи вродени мани, болести на белите дробови и рак - при што особено се ранливи децата. Според ОН, најтешко погодени се најчесто осиромашените рурални заедници, чии жители можеби не се свесни за отровните последици на хемикалиите врз нивната средина.

Македонското Министерство за животна средина, исто така, презентираше докази дека количините на токсичен отпад се повисоки од наведените во извештајот. Студијата која ја подготви ова министерство покажа дека во 1999 година вкупното количество на токсичен отпад во земјата била поголема од 45.000 тони. Од тоа, отпадот од домаќинствата сочинува 4.800 тони, од претпријатијата 3.000 тони и медицинскиот отпад сочинува 1.000 тони. Градежниот отпад во студијата се пресметува на 6.000 тони, индустрискиот на 30.000 тони, а земјоделскиот отпад на 200 тони.

Направена е физибилити студија за намалување на загадувањето на животната средина во Македонија. Според пресметките на ОН, расчистувањето на еден тон токсични пестициди чини 3.500 американски долари, додека вкупната вредност на расчистувањето на отпадот во Македонија ќе биде околу 35 милиони американски долари.