Гласањето за Шенген поттикна „Војна за лалињата“

24/09/2011

Романските блогери дискутираат за холандското вето и неочекуваниот одговор од властите во Букурешт.

Пол Чикои за Southeast European Times во Букурешт -- 24.09.11

Властите во Романија остро ја критикуваа одлуката на холандската влада за ставање вето на пристапувањето на Романија и Бугарија. [Ројтерс]

Одлуката на холандската влада во петокот (23-ти септември) за ставање вето на романскиот и бугарскиот пристап во беграничната Шенген област не помина добро во Букурешт.

Споменувајќи го слабиот резултат во борбата против корупцијата, владејачката коалиција во Хаг предупреди дека нема да го поддржи француско-германскиот компромис на планираното пристапување на двете балкански земји.

„Холандската влада е на некој начин заробеник на антиевропската, антиимиграционата агенда на една екстремистичка партија“, рече министерот за надворешни работи, Теодор Баконшчи, алудирајќи на популистичката Партија на слободата, која ја поддржува кревката владина коалиција во Хаг.

Претседателот Трајан Басеску, исто така, остро ја критикуваше одлуката на холандската влада. „Холандија нема аргументи да го оцени пристапувањето на Романија во Шенген областа. Таа е најголем инвеститор во Романија. Ако корупцијата е толку голема, дали Холанѓаните ќе инвестираа 11 милијарди евра во Романија“, рече Басеску во средата, подвлекувајќи дека Романија ги исполни сите технички критериуми за пристапувањето.

Коментарите на Басеску дојдоа набргу откако холандската бизнис заедница во Романија изрази неодобрување на одлуката што ја донесе владата во Хаг и предложи попрактичен пристап, имено сценариото во два чекори предложено од Франција и Германија.

Коинциденција, или не, еден ден откако Холанѓаните рекоа дека ќе кажат „не“ за напорите на двете држави за пристапување во безграничната област, сите холандски камиони што носат лалиња, главички и семиња, беа запрени на романската граница.

Граничната полиција и санитарната агенција тврдат дека цвеќињата носеле „опасна бактерија“. Спорот, познат како „Војна за лалињата“, ги налути некои холандски пратеници кои ја нарекоа практиката „уцена“. Европската заедница објави дека го разгледува прашањето.

„Холандија не нé сака во Шенген областа ... и одеднаш ние не сакаме да ги мирисаме холанските цвеќиња“, вели новинарот Viorel Dobran. „Ниту Финска не нé сака. Што ќе правиме? Побарајте му на Дедо Мраз сметки за подароците во неговата торба, застанете ги ирвасите на границата за да ги иритираме соседните земји откако сите деца таму не ги добиле своите колачи?“, вели тој.

Lucaman не се согласува. „Дали сé се сведува на расположението на Холандија и Финска? Или се работи за некои јасни технички критериуми што се исполнети со големи финансиски трошоци на Романците?“, прашува тој.

Поврзани написи

„Ако тоа така се прави, тогаш не сакаме да ги мирисаме нивните лалиња. Од овој момент не треба да се грижиме дали ќе се однесуваме грубо пред таквата глупава холандска политика на ниво на европска детска градинка“, тврди тој.

Новинарот Mihai Gotiu тврди дека реакцијата на Романија е неоправдана. „Црвениот картон што го покажа Холандија е моментно едно од последните средства на притисокот што може да ги принуди Романците да станат држава на владеење на правото. Значи, г-дин Басеску и Баконшчи, прво решете ги внатрешните проблеми, потоа покажувајте на Холандија“, препорачува тој, наведувајќи го, како што вели, грешниот правен систем.

Mariusc тврди дека ја нашол вистинската причина зад одлуката на Холандија. „Сметам дека вистинската причина што не сме пожелни во Шенген областа е поврзана со економијата. Приклучувањето на Шенген областа значи слободен проток на стока. Значи, ако произведувам нешто тука во Романија, можам да го продавам без даноци и царински проверки, така што можам полесно да го продавам во странство“, објаснува тој.

На крајот, некои почнуваат да се запрашуваат за влогот на влезот во Шенген областа. „На крајот на краиштата, зошто ни треба Шенген? И онака ја преминуваме границата само со лична карта. Разликата меѓу Шенген и не-Шенген е две минути на царина и околу десетици милиони евра заштеда“, тврди Ribelalu argues.

Оваа содржина е овластена за SETimes.com.