Блогерите се прашуваат: Дали човечкиот живот има цена?

19/03/2010

Одлуката да му се платат 250.000 евра отштета на семејството на убиениот српски претседател Иван Стамболиќ ги навраќа блогерите на суровоста и репресијата на режимот на Милошевиќ.

Од Бојана Миловановиќ за Southeast European Times во Белград --19/03/10

Во 2004 година обвинетите беа судени во Белград за убиството од 2000 година на поранешниот претседател Иван Станболиќ. [Getty Images]

Поранешниот српски претседател и шеф на Комунистичката партија Иван Стамболиќ беше пријавен за исчезнат во 2000 година, непосредно пред да биде соборен Слободан Милошевиќ од власт. Три години подоцна, телото на Стамболиќ беше пронајдено во дупка, покриена со вар.

Судската пресуда потврди дека убиството било нарачано од Милошевиќ, наследникот на Стамболиќ и некогашен близок соработник.

Минатата недела државата му плати на семејството на Стамболиќ 250.000 евра отштета. „Неоспорно е дека сумата не е доволна и дека во некои други европски држави истата би изнесувала неколку милиони. Но, економскиот капацитет на државата моментно не дозволува повеќе“, рече претставникот на Министерството за правда Слободан Хомен.

Блогерите жестоко одговорија на одлуката на државата. На многумина особено им пречи фактот што Социјалистичката партија на Србија, претходно предводена од Милошевиќ, е сега важен дел од владејачката коалиција, заедно со силите кои некогаш се бореа против недемократскиот режим.

„Дури и по оваа пресуда, на некои министри сé уште им виси сликата на Слободан Милошевиќ, докажан убиец, на ѕидовите на канцелариите! Тадиќ, со кого си во коалиција?“, прашува Misa на b92.net.

Bezimena е, исто така, незадоволна од сегашната коалиција на Демократската партија на Тадиќ и социјалистите. „Последиците на церемонијалното помирување меѓу новата Демократска партија и старата Социјалистичка партија на Србија се трупање на неправдата над правдата ... Дали некој забележа дека Зоран Ѓинѓиќ се превртува во својот гроб?“

Intelektualac одбива да живее во држава каде што главните официјални претставници се убиени. „Еј, банана републико, имаш два убиени државници во поновата историја. А цената е само 250.000 евра, од џебовите на невините даночни обврзници? Треба да се срамиш Србијо, секој ден.“

Damir потсетува дека Србија неодамна му плати отштета на семејството на студентот од Њујорк кој беше претепан скоро до смрт, наводно, од страна на српскиот студент Миладин Ковачевиќ, кој потоа избега од САД за да избегне подигнување обвинение. „Оваа држава неодамна плати милиони долари на странски државјанин како отштета за тешки телесни повреди. Она што му се случило на семејството на Стамболиќ е неспоредливо полошо.“

Ivan Cacaj повторува дека режимот на Милошевиќ не му нанесе болка само на семејството на Стамболиќ. „Замислете, кога сите оние на кои Милошевиќ им нанесе физичка, психичка, материјална или некој друг вид штета, се појават... нема да имаме доволно дури и да почнеме да печатиме пари.“

На „Блиц“ Zoran тврди дека државата не требаше да му плаќа отштета на семејството на Стамболиќ со парите на даночните обврзници. „Српските граѓани и даночни обврзници не беа тие што го нарачаа убиството на Стамболиќ и не се одговорни за истото. Оној што го нарачал, организирал и спровел кривичното дело, треба да плати за тоа. По смртта на Милошевиќ остана имот, тука е и имотот на (Милорад Улемек) Легија и неговите злосторници, тој имот треба да се заплени и да се искористи за плаќање на отштетата за семејството на Иван Стамболиќ.“

Пишувајќи на на веб-страницата на РТС, корисникот Anonimus rи потсетува сите за околностите под кои Стамболиќ беше убиен и суровоста на режимот на Милошевиќ.

„Овој човек починал во вар. Не верувам дека некој може да каже нешто добро за Милошевиќ. Затоа ние сме тука каде што сме, бидејќи некои не научија ништо од искуството, а тоа е трагично“, пишува тој.