Од модна писта до Стразбур

20/03/2009

Политичките амбиции на најмладата ќерка на романскиот претседател Трајан Башеску предизвикуваат негодување меѓу блогерите.

Од Пол Чикои за Southeast European Times во Букурешт – 20/03/09

Eлена Башеску. [AФП]

Името на манекенката Елена Башеску буди во главата слики на гламур и луксуз, но не и на политички вештини. Пред една година, ќерката на романскиот претседател јавно погрешно ја изговори множинската форма на имената „успех“, предизвикувајќи потсмев во медиумите. Кога објави дека ќе се кандидари за место во Европскиот парламент (ЕП), реакциите беа брзи и лути.

Алина Мунгиу-Пипиди -- позната политичка аналитичарка која владејачката партија се обидува да ја регрутира за јунските избори и претседател на Романското академско друштво (САР) -- рече дека никогаш нема да ја дели партиската листа со 28-годишната Башеску.

Претседателот Трајан Башеску одговори во интервју дека неговата ќерка „е многу попаметна отколку што мислите“. Во време на вжештена јавна дебата, Елена Башеску во средата (18-ти март) објави дека ја напушта Демократската либерална партија (ПДЛ) за да се кандидира како независен кандидат, но ќе й се врати на партијата по изборите.

Блогерите ги споделуваат своите мисли, кои се многу критични. „Јас немам никаков проблем со Елена Башеску како карактер од [високото] општество. ... Но, имам проблем со Елена Башеску како претставник на новиот бран политичари“, вели Andreea Vasile на блогот Inpolitics.

Mohui се придружува на хорот критичари. „Се прашувам што ќе им каже на колегите европарламентарци? Ќе ги учи ли за модата, чудните фризури и 5-милиметарскиот слој кармин (...)?“, пишува таа.

„Може ли некој да напише нешто за кандидатурата на Елена Башеску на европските избори без да збесне?“, прашува Mihnea Marutza на својот блог. „Мораме да се запрашаме дали таа има политичко искуство и интелектуален капацитет да ја претставува Романија во ЕП.“

Некои не се согласуваат со чувството што преовладува. „Верувам дека Елена има шанси да стане најмладиот романски европарламентарец. Убеден сум дека Елена ќе собере двојно повеќе од потребните 100.000 потписи“, пишува Victor Roncea, постар уредник на весникот Зиуа, на својот блог.

Anne-Marie Blejan, новинар и специјалист за европски прашања, на својот блог вели дека младата Башеску сега ќе си ја одреди сопствената судбина. „Нејзината кандидатура ... ќе й помогне или да стави крај на своите политички амбиции или да ни докаже на сите нас кои ја криткуваме ... дека многу сме згрешиле“, заклучува таа.