Косовските блогери го поздравија признавањето од страна на Црна Гора и Македонија

17/10/2008

По признавањето на црногорските и македонските водачи на независноста на Косово на почетокот од октомври, косовските блогери воорушевено ја фалат одлуката.

Од Беса Беќири за Southeast European Times во Приштина – 17/10/08

Македонија и Црна Гора неодамна го признаа Косово и добија големи пофалби од косовските блогери. [Getty Images]

Еден ден откако Генералното собрание на ОН ја усвои српската резолуција во која се бара Меѓународниот суд на правдата да ја процени законитоста на косовското прогласување независност, приштинската телевизија Коха Вижн јави за признавањето од страна на Македонија и Црна Гора на независноста на Косово.

Косовските медиуми едногласно им кажаа "hvala lijepo" („ви благодариме“) на двете земји и нивните водачи, рефлектирајќи го општото мислење на мнозинството косовски Албанци.

Сепак, во донесувањето на одлуката во ОН, двете земји не сакаа да го навредат Белград. Скопје се воздржа од гласање, додека Подгорица гласаше за српската резолуција. Од поранешните југословенски републики надвор од Србија, само Босна и Херцеговина сé уште не го признала Косово.

Xheki, Албанец од Црна Гора, вели дека ќе го прослави признавањето на Косово од страна на Црна Гора заедно со своите црногорски пријатели.

„Ти благодарам Црна Гора“, пишува Kujtimi од Косово. „Ова се добри вести, но Црна Гора имаше свои интереси [да ја признае независноста на Косово], бидејќи има намера да стане дел од ЕУ“, вели Bekimi од Приштина.

Блогерот Visari им се заблагодарува на Албанците во Македонија и Црна Гора за нивниот придонес во неодамнешните дипломатски победи.

На Коха Вижн (косовска телевизија) македонскиот министер за надворешни работи, Антонио Милошоски, рече дека двете земји, Србија и Косово, се важни за неговата земја. Откако Македонија ја призна независноста на Косово, Косово од своја страна го објави своето признавање на уставното име на Македонија во понеделникот.

„Браво Скопје“, извикува Naser Prapashtica, додека Velson пишува: „Македонија, на крајот, ја призна независноста на Косово. Многу сум среќен за ова признавање.“

Црногорскиот министер за надворешни работи, Милан Рочен, рече дека одлуката на Црна Гора за признавање на Косово уследи по позицијата и одлуките на ЕУ.

Како последица на тоа, двете земји се соочија со лутите реакции на Белград и критиките на просрпските граѓани.

Во Подгорица околу 10.000 просрпски демонстранти протестираа против одлуката на владата за признавање на Косово. Демонстрантите викаа „Предавство! Предавство!“ и „Косово е Србија!“. Водачот на опозицијата му даде на премиерот Мило Ѓукановиќ рок од 48 часа да го поништи признавањето на Косово или да распише референдум за ова прашање, објави „Балкан инсајт“.

Блогерите од косовските Албанци, пак, го поздравија Ѓукановиќ. „Браво Мило Ѓукановиќ, за вашата храброст и јасната визија за народот и државата што ја водите“, извика косовскиот блогер Fisi.