Комшиќ вели дека кражбата од страна на политичарите мора да престане

21/03/2008

Може ли јавната корупција во БиХ да биде зауздана?

Од Жељана Грубишиќ за Southeast European Times -- 21/03/08

Членот на претседателството на БиХ, Жељко Комшиќ. [Getty Images]

Членот на претседателството на Босна и Херцеговина (БиХ) Жељко Комшиќ редовно пишува на својот блог за прашањата што ја засегаат земјата. Во последното пишување, тој се осврнува на прашањето на корупцијата -- нешто за кое тој вели дека „навистина ја поткопува БиХ“.

„Вчера потпишав изјава за враќање на украдениот имот бидејќи не сакам да чувствувам срам поради раширеното мислење дека сите политичари во БиХ се крадци. Не сме сите исти и јас не сакам да бидам дел од тој стереотип“, пишува Комшиќ.

Тој повикува на ставање крај на лицемерството во врска со корупцијата. „Општо познато е дека, за повеќето, „валканите пари“ на политичарите доаѓаат од лажните приватизации, наместените тендери и работни места -- како и од организираниот криминал. Јас мислам дека нашето окружно јавно обвинителство покажа неспособност за решавање на ова прашање“, пишува тој.

Комшиќ, исто така, говори во прилог на легислативата предложена од неговата партија, Социјалдемократската партија. Предлог-законот за кој станува збор го отвора патот за запленување имот кој е стекнат со криминални активности.

Иако неговата партија е спонзор, Комшиќ вели дека би ја поддржал мерката без оглед кој ја предложил. „Не поради партијата, туку поради потребата за ваков закон“, пишува тој.

Блогот на Комшиќ привлекува стотици коментари -- некои позитивни, други поскептични. Camus, на пример, го поздравува Комшиќ за давањето „позитивен пример“ на јавност. Во ист стил, Xlady11 пишува: „Г-дине претседателе ... од секоја одлука што ја носите јасно е дека сте за БиХ и БиХ во Европа.“

Но mirnesa, попретпазливо, е загрижен дека иницијативата ќе остане „само на лист“. Друг коментатор, Bobowac, смета дека е премногу згодно што Комшиќ го покренува прашањето „непосредно пред [локалните] избори“.

За zekeriyyah, оваа тема е стара вест. „Веќе три години говорите за одземање на нелегално стекнатиот имот! Сменете ја приказната“, се жали тој.

„Ја поздравувам идејата“ пишува krug114, „но, исто така, сметам дека таа е длабоко УТОПИСКА. Јас мислам дека сите ние сме свесни оти тоа е утопија. Затоа барам одговор на две прашања: 1)Што сакате да постигнете со овој потег? и 2) Дали сметате дека оваа инцијатива ќе донесе некакви резултати и какви?“