Специјален третман за Главаш?

03/11/2006

Одложувањето на апсењето на една моќна политичка фигура претставува доказ дека сите граѓани не се еднакви пред законот, вели еден хрватски блогер.

Од Balkanblogs за Southeast European Times – 03/11/06

Бранимир Главаш. [Getty Images]

Хрватските блогери имаа многу што да кажат за контроверзноста околу Бранимир Главаш, поранешниот заменик на ХДЗ, кој е под истрага во врска со воените злосторства во градот Осиек. Главаш командуваше со одбраната на Осиек за време на конфликтот во периодот 1991-1995 година и властите сакаат да откријат дали тој бил вмешан во тортурата и убивањето на српските цивили.

Дури откако државниот обвинител побара Главаш да биде ставен во притвор, мораше да помине некое време. Истражниот судија во Осиек, Марио Ковач, донесе пресуда дека случајот не е во негова надлежност. Главаш конечно беше уапсен на крајот од октомври и набргу потоа започна штрајк со глад во знак на протест поради неговото притворање.

За некои, одложувањето го покажа специјален третман, кој го имаат влијателни политички фигури во регионот.

„Сé што направија досега беше префрлање на надлежноста од еден суд на друг“, пишува Croatian.Nauseous.News. „Без дури и да разговараме за тоа дали Главаш е виновен или не -- што ќе биде утврдено за време на судењето -- ние можеме да видиме дека, во споредба со кој било друг граѓанин на оваа земја, Главаш секојдневно добива различен третман од судството.“

Во меѓувреме, opinioiuris изразува загриженост дека превирањата што ја следат кривичната постапка против Главаш би можеле да ги поткопаат напорите на Хрватска да покаже дека може да се справи со случаите на воени злосторства.

Трибуналот на ОН во Хаг сака да й ги предаде таквите случаи на Хрватска, како дел од својата излезна стратегија. Но, правните и политичките ујдурми околу Главаш не покажуваат дека Хрватска е подготвена за тоа, пишува тој.

„Ако случајот на Главаш претставува пример за тоа што може хрватската јавноста да очекува во судските процеси против поединците кои извршиле злосторствата против Србите, тогаш дури и основните услови за префрлање на случаите од Хаг -- независноста на судството и правото на фер судење -- се чини дека се сериозно загрозени“, заклучува opiniorusis.

RAGE, пак, смета дека ова е повеќе работа на политичка одмазда.

„Од минатиот април, кога Главаш ја напушти ХДЗ, се води негативна кампања, како и оцрнување и заговор против осиечкиот можен играч“, пишува тој. „Овие настани покажуваат дека предизборните игри добиваат на интензитет и дека сите се обидуваат да извлечат корист.“

Исто во Хрватска:

Runngun е загрижен дека премногу англизми и други странски зборови се вовлекуваат во хрватскиот јазик. Луѓето сé повеќе ги користат тие увезени зборови, дури и кога нивното значење може да се изрази со хрватски збор појасно и попрецизно. За да се подобри ситуацијата, пишува тој, едно хрватско списание организираше натпревар за најдобар хрватски збор.

„Тие сакаат да ги инспирираат луѓето да прекинат со користењето англизми и да ги користат хрватските изрази наместо странските. Тие дури нудат и награди од 1.000 до 2.000 куни за најдобрите предлози. Ако смислите нешто, ова би можел да биде лесен начин да заработите пари.“