SETimes.comIsh kryeministri rumun do të formojë qeverinë e re
12/12/2008
Presidenti Traian Bashesku propozoi ish kryeministrin Theodor Stolojan të mërkurën për të formuar qeverinë e re të koalicionit PDL-PSD.
Nga Paul Kiokoiu për Southeast European Times në Bukuresht – 12/12/08
Vendimi i presidentit për të propozuar Theodor Stolojan si kreun e qeverisë së re të mërkurën (10 dhjetor) nuk ishte shumë i papritur. Politikani veteran shërbeu më parë si kryeministër i Rumanisë, dhe përpara kësaj, si ministër i financave në vitet e trazuara që pasuan rënien e regjimit të Çausheskut.
Me Rumaninë që ndeshet me ndikimin e krizës globale financiare ndërsa hyn në një periudhë reformash vendimtare, presidenti ka zgjedhur dikë që njihet për rolin e tij në rindërtimin e ekonomisë së vendit.
"Ne na duhet një kryeministër i aftë," tha Bashesku duke shtuar se i propozuari i tij kupton sfondin e rënies ekonomike botërore dhe ka autoritetin e nevojshëm të udhëheqë vendin në kohë të vështira.
Ai i preu shkurt thashethemet se qeveria do të ishte jetëshkurtër. Kryeministri do të shërbejë për katër vjet, tha Bashesku.
Stolojan tha se kabineti i tij do të ketë dy misione "tepër urgjente: trajtimin e situatës ekonomike ndërsa rinis gjithashtu reformat në fusha jetike si shëndetësia dhe arsimi.
Ai tha se shpresonte se qeveria e re do të betohej deri në 22 dhjetor.
Të dy partitë e koalicionit do të nisin negociata për portofolet ministrore. E çara e parë në atë që duket të jetë një bazament solid ndodhi kur të dyja ato nuk mundrën të binin dakord në se do të pranohej partia etnike e hungarezëve, UDMR në koalicionin qeverisës. Partia Social Demokratike (PSD) është kundër bashkimit të UDMR në koalicion dhe thotë se çështja është e panegociueshme.
Ish zyrtarët e njohur për rolin e tyre në luftën kundër korrupsionit, mund të kthehen. Ata përfshijnë Vasile Blaga që shërbeu si ministër i brendshëm nga 2004 në 2007 dhe Monika Makovei, që ishte ministre e drejtësisë gjatë së njëjtës periudhë.
Kreu i PSD Mirçea Geoana pritet të bëhet presidenti i ardhshëm i senatit dhe nënkryetar i Këshillit të Lartë të Mbrojtjes së Vendit (CSAT).
Programi i fushatës së Stolojan theksoi zgjatjen e periudhave të kredive të përfituara nga rritja e vlerës së shtëpive, për familjet në vështirësi, rritjen e diskutueshme 50% të pagës së mësuesve, përshpejtimin e reformës së administratës publike, rinisjen e procesit të privatizimit dhe zbatimin e përjashtimeve nga taksat për fitimin e riinvestuar.
Stolojan, nënpresident i Partisë Liberale Demokratike (PDL) u tërhoq nga gara presidenciale katër vjet më parë për t'i hapur rrugë Basheskut i cili fitoi postin. Një ekonomist nga formimi, ai mbajti një pozitë të lartë në Bankën Botërore nga 1992 në 1999, pas termit të tij në postin politik.