SETimes.comRrënim për Serbi-malin e Zi: 0-6 kundër Argjentinës
16/06/2006
Dy ndeshje në grupin C në Kupën Botërore në Gjermani dhe Serbi-Mali i Zi nuk ka ç'të tregojë tjetër veç dëshpërimit. Argjentina me golat e Maksi Rodriguez (6' dhe 41'), Kambiaso (29'), Krespo (78'), Tevez (84') dhe Mesi (88') u dha Kaltëroshëve një leksion të fortë për futbollin modern të premten në Gelsenkirçen.
Nga Georgi Mitev-Shantek për Southeast European Times -- 16/06/06
Për Serbi-Malin e Zi, humbja apo barazimi nuk ishte një opsion i pranueshëm të premten (16 qershor) në ndeshjen e tyre kundër Argjentinës. Vetëm një fitore do t'i shpinte ata për në raundin e dytë të Kupës Botërore 2006 në Gjermani.
Por ishte Argjentina që jetoi çastin, duke e nisur ndeshjen me tre sulmues. Taktika e trainerit Hoze Pekerman u shpërblye me avazin e gjashtë golave në portën e Dragoslav Jevriç. Për Kaltëroshët kjo ishte mundja më e keqe ndonjëherë në kampionatet botërore.
Asgjë nuk shkoi siç duhej për skuadrën e Ilia Petkoviçit. Mbrojtja luajti pa Nemanja Vidiç të dëmtuar dhe Milan Dudiç hyri në lojë në vend të Ivica Dragutinoviç. Kombinimi, zbatuar për herë të parë qe thjeshtë i paaftë të mbante vijën kundër sulmit të fuqishëm argjentinas.
Vetëm pas gjashtë minutash në pjesën e parë, Maksi Rodriguez i shpuri përpara të vetët me anën e një goli. Me dy pasime të dyfishta në anën e majtë, Argjentina e mposhti krejtësisht mbrojtjen e Serbi-Malit të Zi. Vija e fundit të Kaltërve ishte me një njeri mangut pasi Nadj mbulonte Rikelme dhe kjo i dha mjaft hapësirë sulmuesit tjetër të Albicelestes. Dudiç e mbylli von Rodrigezin i cili nuk e pati vështirë të shënonte.
Argjentina luajti një lojë pasimesh dhe mesfusha e saj ishte efektive në mbajtjen e topit. Më së fundi, në minutën e dhjetë, Gjorgjeviç bëri goditjen e parë për Serbi-Malin e Zi, por topi doli jashtë. Pesë minuta më pas, i njëjti lojtar lëshoi një top të shkëlqyer për Kezman por sulmuesi i Atletiko të Madridit, nuk arriti ta kapte. Ndërsa pjesa e parë vazhdonte, Kaltëroshët qenë në gjendje të bënin diçka që i ngjante një loje në mesfushë, ndonse me vetëm pakë kalime në vijën e përparme.
Por në qoftë se tifozët e Serbi-Malit patën nisur të marrin shpresë, ata do të pësonin një dush të ftohtë në minutën e 29-të. Me një perfeksion si sahat, argjentinasit përdorën një duzinë pasash për ta çuar topin te Krespo në zonën e penalltisë. Ai e kaloi atë te Kambiaso i cili e lakoi goditjen në të djathtë të Jevriçit të pafuqishëm.
Megjithë avantazhin solid. Argjentina nuk fjeti mbi dafina. Përkundrazi, Serbi-Mali i Zi humbi çdo shkëlqim të vërtetë krijues. Ata nuk mund të mblidhnin asnjë sulm të vetëm të mbështetur dhe Kezman e Millosheviç e gjetën veten të izoluar përpara.
Dhjetë minuta pas golit të dytë, Albiceleste tregoi më tepër magji. Saviola i rrëmbeu një top mbrojtësit me përvojë të Shalke, Krstajiç, pastaj mposhti Nadj dhe gjuajti në portë. Portieri i Serbi-Malit të Zi e shtyu topin tutje, për fat të keq në drejtim të Maksi Rodriguez. Tabela lexoi tani 3-0.
Pas pushimit, traineri hoqi Nadj dhe më pas Koroman. Për një kohë, ndrrimet sollën pakë jetë në mesfushën serbe. Një gjuajtje nga larg e Millosheviçit e detyroi portjerin Abondazieri ta ngrejë topin mbi portë. Duljaj, nga vija anësore kapi Kezman. Ai lëshoi një pas prapa te Millosheviç dhe shënuesi i Osasunës e nxorri atë jashtë portës në krahun e djathtë. E gjithë ç'ja doli të arrijë Serbi-Mali i Zi në fund ishte një karton i kuq për Kezman në minutën e 65-të. Me një lojtar më pak, Kaltëroshët e humbën çdo vendosmëri që u kishte mbetur.
Për asnjë çast Argjentina nuk luajti për të ruajtur rezultatin. Pekerman hodhi dy të tjerë në sulm, "brazilianët" Karlos Tevez dhe Lionel Mesi, ndoshta lojtari i ri më i talentuar në botë, për të zëvendësuar Saviolaën dhe Rodriguez. Vetëm pas katër minutash në lojë, Mesi vërshoi nga e majta dhe gjeti Krespon larg. Gjitrhshka që duhej të bënte sulmuesi i Çelsit ishte ta shtynte topin në rrjetë.
Dhe sulmi vazhdoi. Karlos Tevez mori një krosim të bukur nga qendra dhe shpejt e pati Jevriç në mëshirën e tij: 5-0. Portjeri i Serbi-Malit të Zi që qe mposhtur vetëm dy herë në 11 ndeshjet e kaluara, duroi tjetër mjerim katër minuta më pas i pamundur të ndalte një top nga Mesi.
Albiceleste e garantoi daljen në raundin e dytë në një mënyrë përshtypjelënëse ndërsa për të Kaltrit dhe tifozët e tyre të dëshpëruar, e gjitha ç'mbetet është të fitojnë pakë respekt për veten. Ata do të kenë një shans për ta bërë këtë në 21 qershor kundër Bregut të Fildishtë.