SETimes.comРеновираната Сараевска зоолошка градина ќе привлекува туристи
12/01/2009
Сараевската зоолошка градина е прекрасна туристичка атракција -- место за одмор и релаксација или забава меѓу различните животински видови.
Од Јусуф Рамадановиќ за Southeast European Times во Сараево – 12/01/09
Сараевската зоолошка градина, основана во 1951 година, се протега на 8,5 хектари земја. Пред балканскиот конфликт, таа поседуваше 150 животински видови. Опсадата на Сараево од 1992 до 1994 година ја уништи зоолошката градина. Животните умреа од глад или беа жртви на артилериски или снајперски оган. Последното животно, мечка, умре во 1992 година.
Во 1999 година во зоолошката градина пристигнаа првите нови животни, кога управата започна со реновирање и проширување на напорите за привлекување посетители. Моментно во зоолошката градина има околу 38 животински видови, вклучително и мајмуни, питони, лами, ноеви, змии -- највпечатлива е боата -- елен и северен елен, бафало, различни водни птици и други видови птици и скапоцена црна мечка.
Зоолошката градина купи нов терариум, кој е дом на еден кејмен и неколку желки. Моментно се подготвуваат 1.000 квадратни метри за сместување пуми, лавови и сурикати, чии нормални живеалишта се африканските савани и грмушки. Исто така, зоолошката градина се надева дека градот ќе го финансира новиот простор за нејзините мајмуни.
„Постојат напори за обезбедување специјални животни услови, како во Африка, за овие видови“, вели ветеринарот во зоолошката градина Ведад Скапур.
„Сараевската Зоолошка градина постојано работи на подобрување на животните услови за сите животни, со цел да ги исполни стандардите на Европската асоцијација на зоолошки градини и аквариуми (ЕАЗА)“, рече Скапур. „Тоа ќе ја унапреди соработката во подобрувањето на заштитата на регионалните диви животни и образованието, особено во областа на животната средина.“
Неодамна зоолошката градина повторно воспостави соработка со многу поголемата Белградска зоолошка градина. Сега се очекува да добие донација на животни од Белград. Пред 1990-тите многу од сараевските животни доаѓаа од Српската зоолошка градина. Како дел од оваа регионална соработка, Сараевската зоолошка градина й подари четири животнски видови на зоолошката градина во Бања Лука -- една лама, еден шкотски бик, точкест елен и џуџести гуски.
Зоолошката градина е најголема и најпозната од ваков вид во БиХ. Таа привлекува 350.000 посетители годишно. „Навистина е убаво овде. Децата може да ја посетат и да научат за животните. Најинтересно, за мене, е кај желките и змиите во терариумот. На мојот син му се допаднаа мајмуните и црната мечка“, вели Емина, мајка на двегодишно дете.
Покрај животинскиот дел, зоолошката градина нуди и области за рекреација -- цветни алеи, патеки за шетање, вештачки езерца со птици и игралиште кое вклучува електричен воз и автомобили, лизгалки, нишалки и вртелешки.
Поголем дел од посетителите на зоолошката градина се деца -- што е поттик за надежите дека таа би можела да си го поврати статусот на омилена викенд дестинација како за децата, така и за возрасните.